Husi total vasina numeru ne’e, kompostu husi vasina AstraZeneca ne’ebé fasilita husi sistema COVAX Facility rihun 100.800, Nova Zelandia rihun 24, Xina rihun 100 (Sinovac), Australia rihun 577.580, Portugal rihun 12 no Japaun rihun 168.
Enkuantu, husi numeru ne’e, Timor-Leste halo ona vasinasaun ba iha populasaun ne’ebé elejivel hahú husi tinan 18 ba leten, iha Kapital Dili to’o loron 16 fulan-Agostus tinan 2021 ho doze dahuluk atinji ona rihun 340.985 ka pursentu 45,2 (42,2%) no doze daruak hamutuk 127.769 ka pursentu 16,9 (16,9%).
Entretantu, iha segunda ne’e, Primeiru Ministru Taur Matan Ruak simu vasina AstraZeneca ne’ebé oferese husi Governu Japaun mai Governu Timor-Leste liu husi COVAX-ONU nia iha, Ministériu Negósius Estranjeirus no Kooperasaun, iha Praia dos Coqueiros, Dili, nune’e, PM agradese tebes ba esforsu Embaixadór Japaun iha TL ba apoia refere.
Tanba ne’e, Xefe Ezekutivu hodi povu Timor-oan sira-nia naran, agradese espesiál ba Governu no povu Japaun no ba Primeiru-Ministru ba jenerosidade hodi tulun povu Timor-Leste hosi pandemia Covid-19-19, liu husi doasaun vasina.
“Sr. Embaixadór, ha’u hakarak lori ha’u nia naran rasik, lori povu Timor nia naran, agradese ita-boot nia esforsu tomak no liuhusi ita-boot agradese ba Sr. Primeiru-Ministru Japaun no povu Japaun ba jenerosidade ne’ebé fó kontribuisaun vasina para salva vida iha ami nia rain” dehan nia iha komunikadu ne’ebé Online INDEPENDENTE asesu, tersa ne’e (17/08).
Xefe Governu mós la haluha agradese espesiál mós ba Organizasaun Mundial Saúde (OMS), UNICEF ba esforsu fasilita transportasaun vasina sira ne’e mai Timor-Leste.
“Ha’u-nia agradese espesiál ba organizasaun Mundial Saúde no UNICEF ne’ebé halo esforsu ho difikuldade boot mós lori vasina ne’e to’o iha Timor, ho apoiu sira ne’e ha’u iha serteza katak a fim do ano se la’ós 100 % vasinasaun mak ami atinje, pelumenus 80% populasaun hetan vasinasaun para bele Timor fila-fali ba normalidade”, tenik.
Governu mós agradese tebes ba profisionais Saúde iha Munisípiu Dili ne’ebé halo esforsu másimu hodi konsege vasina populasaun Dili pursentu 70 (70%) iha doze dahuluk no pursentu 49,1 (49,1%) iha doze daruak, númeru ne’e signifikante tebes, tanba Dili hanesan sidade kapitál ho númeru populasaun as liu ne’ebé ho komplesidade oioin, hodi hatutan ne’e nu’udar ezemplu ba Munisípiu seluk.
Nune’e, Xefe Governu prevé katak, to’o tinan ne’e nia rohan, pelumenus populasaun Timor-Leste pursentu 80 (80%) vasinadu hotu ona, nu’udar rekizitu ida hodi bele fó dalan ba Governu deside filafali ba normalidade foun.
Asistente Editor: Saturnina da Costa