Primeiru-Ministru (PM), Kay Rala Xanana Gusmão deklara ida-ne’e durante enkontru ho Prezidente Asembleia Nasionál Vietname, Tran Thanh Man, iha sede Asembleia Nasionál Hanoi, Vietname, Tersa (09/06).
Durante enkontru, líder na’in-rua diskute relasaun instituisaun lejíslativa sira no oportunidade atu hametin kooperasaun bilaterál entre Timor-Leste ho Vietname.
Timor-Leste valoriza tebes amizade no relasaun istórika ne’ebé kleur ona ho Vietname, no rekoñese papél importante Asembleia Nasionál Vietname nian iha promosaun diálogu, komprensaun mútua no kooperasaun entre nasaun rua.
“Hau hakarak hato’o ami-nia apresiasaun ba Vietname nia amizade no apoiu kontinua ba Timor-Leste, partikularmente iha ami nia dezenvolvimentu nasionál, harii instituisaun no integrasaun rejionál,” PM Xanana liu husi komunikadu ne’ebé Online INDEPENDENTE asesu, Kuarta (10/06).
Agradese mós apoiu Vietname nian bá adezaun Timor-Leste bá ASEAN no afirma katak Governu Timor-Leste hein atu aprende nafatin hosi esperiénsia Vietname nian iha kooperasaun rejionál, dezenvolvimentu lejislativu no planeamentu estratéjiku nasionál.
Xefe Governu mós manifesta esperansa katak Parlamentu Nasionál Timor-Leste bele hala’o vizita bá Asembleia Nasionál Vietname iha futuru atu aprofunda troka esperiénsia no reforsa relasaun entre instituisaun lejíslativa rua.
Timor-Leste mós interessa atu aprofunda kooperasaun iha área prioridade sira hanesan dezenvolvimentu ekonómiku, agrikultura, seguransa ai-han, konetividade no dezenvolvimentu rekursu umanu. “Ami fiar katak involvimentu parlamentar ne’ebé forte liu bele ajuda fornese fundasaun sólidu ba kooperasaun ne’ebé luan liu entre ita nia povu sira,” Nia espresa.
Xefe Governu mós hato’o parabéns bá Tran Thanh Man bá ninia lideransa kontinua nu’udár Prezidente Asembleia Nasionál Vietname nian, reafirma vontade atu kontinua hametin amizade no kooperasaun bá benefísiu mútuu povu Timor-Leste ho Vietname.
Partisipa iha reuniaun ne’e PM Xanana akompaña hosi membru Governu no delegasaun ofisiál Timor-Leste nian, inklui Vise-Primeiru-Ministru sira, Ministru sira, Vise-Ministru sira, Sekretáriu Estadu sira, Embaixadór Timor-Leste iha Vietname no reprezentante instituisaun Estadu sira.