Diretór Nasionál Polítika Igualdade Jenéru iha Sekretária Estadu Igualdade, Abilio Barreto hatete, tema jerál ba selebrasaun loron nasionál feto tinan ida ne’e maka “Feto Timor-Leste Selebra O Nia Direitu Igualdade no Oportunidade”.

“Iha tinan ne'e, ita sei selebra hamutuk ho Autoridade Atáuro ho komunidade sira, feto no mane iha ne'ebá, ba loron nasional feto ba dala-49, ne'ebé sei realiza iha loron 03 fulan-Novembru,”dehan nia ba Jornalista Online INDEPENDENTE iha nia knar fatin, edifisiu SEI, Kaikoli, Dili, Tersa ne’e (21/10).

Nia hatutan, razaun SEI hili Atáuro sai fatin ba selebrasaun loron nasional feto tinan ne’e nian, tanba parte ida atu empodera feto sira iha área rural, inklui realiza atividade sira ne'ebé maka prioridade ba iha feto sira.

Diretór ne'e esplika, ba selebrasaun loron nasional feto iha Ataúro, Sekretária Estadu Igualdade aloka orsamentu ho montante purvolta dolar amerikanu rihun $8, maibé iha verba balun, Sekretária Estadu Igualdade mós aloka orsamentu purvolta rihun $1 to’o rihun $15 ba munisipiu sira seluk atu bele hodi selebra mós loron nasionál feto refere.

“Iha munisipiu seluk mós ita aloka orsamentu balun, tanba iha ne'ebá iha mós pontu fokal balun hodi sira selebra loron nasionál feto ne'e hamutuk ho autoridade sira,”tenik nia.

Nia afirma, kada tinan SEI tau prioridade hodi aloka orsamentu ba kada munisipiu sira, nune'e bele involve hotu feto sira hodi festeza loron nasionál feto nian.

"Entaun ita hili atu selebra iha Atáuro ne'e, osamentu aloka mak purvolta $8 mil, nune'e bele realiza atividade sira”hakotu nia.