Ministra Edukasaun, Dulce de Jesus Soares informa, governu dasia mai ho nia programa iha infraestrutura eskolár, tan ne’e durante mandatu tinan lima iha planu atu harii sala aula 1.550 resin.

"Ba tinan ne'e ita aloka orsamentu hamutuk $7 miloes. Tan ne'e ita sei konstrui sala aula purvolta 1.000 ital," dehan Ministra, iha salaun MSSI, Kaikoli, Kuarta (04/02).

Ministra garante katak to'o tinan 2027 no 2028 bele kompleta ona sala aula 1.550 ne’ebé governu dasia planeia ona.

Aleinde ne'e, nia hatutan, ME planeia atu iha tinan 2027 hahu konstrui mós rezidensia ba profesór sira.

"Ita mós iha planu katak iha tinan 2027 sei konstrui mós rezidensia ba manorin sira ne'ebé ita halo ona kolokasaun," katak nia

Entretantu, tuir dadus, iha tinan 2024, ME laiha projeitu foun, maibé fó de'it kontinuidade hodi finaliza projetu tinan 2023 ho total sala aula 279.

Iha tinan 2025, ME konsege konstrui ona sala aula hamutuk 500 resin

Tuir dadus husi Diresaun Infraestrutura ME, projetu konstrusaun eskola foun 14, husi ensinu baziku sentral no ensinu baziku filial mak la konsege konklui iha tinan 2025.

Projetu eskola foun 14 ne'e, ministériu implementa iha EBF ida iha Aileu, EBF ida iha Ainaro, EBF ida iha Baukau, EBC ida iha Bobonaro, EBF rua iha Kovalima, EBF rua iha Ermera, EBF ida iha Lautem, EBF rua iha Manatutu, no EBF ida iha Manufahi.

Ba konstrusaun sala aula iha eskola 14 ne'e, Ministériu Edukasaun aloka orsamentu ho montante milaun $1.2.

Hakarak lee notisias nee kompletu, asesu deit pajina e-paper INDEPENDENTE: https://digital.independente.tl edisaun kuarta (05/02).