Tuir observasaun husi Jornalista Jornal INDEPENDENTE, iha Kuarta (07/01), bainhira Ministra Elia partisipa iha reuniaun Konsellu Ministru, iha palasiu governu, nia la uza karreta ‘tuan’ ho marka Prado ne’ebé baibain nia uza.

Ba ida ne’e, Ministra Elia to’o no sai husi area Palasiu Governu uza karreta foun ho xapa matrikula ofisial membru governu nian, 00.009 G.

Bainhira jornalista koko atu husu informasaun kona-ba karreta foun ne’ebé iha fulan Outubru 2025 konsege hamosu polemika iha publiku ne’e, Ministra Elia ne’ebé sai husi reuniaun KM, hili hasees an husi Jornalista sira hodi sa’e ba karreta foun no halai ba daudauk.

Kompaña entrega iha Dezembru 2025

Bazeia ba karta orden entrega ne’ebé Jornal INDEPENDENTE asesu, karreta foun ne’e entrega ba Ministériu Saude (MS) iha 24 Dezembru 2025.

Karreta ne’e hatama husi kompaña Revolta Alta Graça Unipesoal LDA, ne’ebé manan tender ba sosa karreta ho folin $140,000.

Iha dokumentu refere hakerek katak, kompaña entrega veikulu automovel foun unidade ida ho marka/modelu Toyota Land Cruiser 300 GR Sport, tinan produsaun 2024/2025, ho kondisaun foun, no ho kodigu kor 090 (branco).

Karta ne’e asina husi na’in ba kompaña, Levi Serano, no MS reprezenta husi Xefe Seksaun, Martinho das Cores X.

To’o notisia ne’e públika, parte Ministériu Saude seidauk fó deklarasaun ofisial kona-ba karreta foun ne’ebé Ministra Elia hahú uza iha inisiu tinan foun ne’e.

Polemika ba karreta foun

Prosesu sosa karreta foun ba Ministra Saude konsege hamosu polemika tanba deskonfia MS kansela sosa ambulansia multifunsaun balun hodi bele sosa Toyota Land Cruiser 300 GR Sport ho folin $140,000.

Tuir dadus ne’ebé ekipa Jornal INDEPENDENTE rekolla, iha inisiu tinan 2025, Diresaun Nasionál Administrasaun Lojistika no Patrimoniu (DNALP)-MS, hato’o espesifikasaun husi ambulansia multifunsaun 11 ba Unidade Aprovizionamentu Sentral (UAC), ho total orsamentu tokon $1 ne’ebé preve iha orsamentu MS nian ba tinan 2025.

Bazeia ba espesifikasaun ne’e, UAC ne’ebé ho knar atu loke prosesu tenderizasaun, hato’o pedidu ba Ministra Elia atu bele hetan aprovasaun.

Iha 26 Fevereiru 2025, UAC hato’o karta ho númeru referensia 126/MS-DNALP/DUAC/II/2025, ba Ministra Elia atu hetan aprovasaun nune’e bele prosesa ona tenderizasaun.

Iha karta ho asuntu: Submete Espesifikasaun ne’e, UAC aprezenta espesifikasaun ba ambulansia multifunsaun ho marka Toyota unidade 11.

“Karta ne’e hato’o dala rua ba Ministra, mais Ministra hatuun fila fali sein despaisu ka nota ruma, dehan de’it troka, no hatama mós Prado,” dehan fonte konfirmadu ida ne’ebé lakohi públika ninia identidade.

Ho orientasaun verbal husi Ministra ne’e, ikus mai planu ba sosa ambulansia multifunsaun 11 ‘kanseladu’. MS deside sosa fali ambulansia multifunsaun tolu (3) ho marka Hilux, rua (2) ho marka Hiace, no rua (2) seluk ho marka BMV, inklui mós Toyota Land Cruiser 300 GR Sport.

Kansela sosa ambulansia multifunsaun

Tuir dadus, iha 26 Juñu 2025, MS liu husi Unidade Aprovizionamentu Sentral (UAC) hasai avizu tenderizasaun, ne’ebé asina husi Diretór UAC, Luis Norberto da Cruz, ba projetu haat, mak hanesan: (1) Kompras Kareta Multifunsaun Hiace/Equivalente mai Ministério da Saude ho nú. RDTL-MS-UAC-KP-25-171; (2) Kompras Kareta Multifunsaun mai Ministério da Saude ho nú. RDTL-MS-UAC-KP-25-172; (3) Kompras Kareta Multifunsaun VIP mai Ministério da Saude ho nú. RDTL-MS-UAC-KP-25-069; no (4) Kompras Kareta Land Cruiser Equivalente mai Ministério da Saude ho nú. RDTL-MS-UAC-KP-25-174.

Hafoin lansa tender, iha 25 Agostu 2025, Diretór Unidade Aprovizionamentu Sentral, Luis Roberto da Cruz Pereira, hasai avizu ba kanselamentu tender ba projetu tolu, mak hanesan: (1) Kompras Kareta Multifunsaun Hiace/Equivalente mai Ministério da Saude; (2) Kompras Kareta Multifunsaun mai Ministério da Saude; no Kompras Kareta Multifunsaun VIP mai Ministério da Saude.

Husi dokumentu ne’ebé iha, hatudu katak MS deside hodi kansela sosa multifunsaun no ambulansia, no kontinua avansa ho projetu sosa karreta Land Cruiser.

Iha 04 Setembru 2025, Ministériu Saude selebra kontratu ho kompaña Revolta Alta Graça, Unipesoal, Lda. ba projetu sosa karreta Toyota Land Cruiser 300 GR Sport.

Iha kontratu ho númeru: RDTL-MS-UAC-KP-25-174 ne’ebé asina husi Ministra Elia no Diretór Kompaña, Xander Maria A. da Costa Serrano ne’e, valor kontratu mak $140,000.

Promete karreta tama iha Novembru

Kompaña Revolta Alta Graça, Unipesoal, Lda. ne’ebé manan projetu sosa karreta ba Ministériu Saude informa katak, karreta ne’ebé sira sosa sei to’o iha Dili, Timor-Leste, iha fulan Novembru 2025.

Kompaña Revolta asina kontratu sosa karreta Land Cruiser, ho Ministra Saude, Elia A. A. dos Reis Amaral, iha 04 Setembru 2025.

"Karreta ne'e ita planu sei to'o iha Dili fulan Novembru ne'e," informa na’in ba kompaña Revolta, Levi Serano, ba Jornalista Jornal INDEPENDENTE via WhatsApp, Kinta (09/10/2025).

Ba folin karreta ne’e, Levi dehan, bazeia ba kontratu ne’ebé asina ho MS, folin ba kareta Land Cruiser unidade ida mak $140,000.

"Ami manan ho presu ida ne'e, maibé desizaun hotu-hotu iha Ministériu. Ami hein rona de'it informasaun, tanba ami hanesan joven ne'ebé halo negosiu ne'ebé mak fó servisu ba Timor-oan sira," katak nia.

Karreta operasional ba MS

Entretantu, iha 10 Outubru 2025, bainhira fó klarifikasaun kona-ba polemika ne’e, Diretór Jeral Servisu Korporativus, Ministériu Saude, Narcicio Fernandes hatete, karreta Land Cruiser ne’ebé MS sosa ne’e ba instituisaun Ministériu Saude.

 “Kona-ba karreta operasional, tantu see de’it mak uza tama ba kareta operasional. Ne’ebé ha’u la temi dehan katak karreta ne’e mai ba see? Karreta Ministeriu nian mai ba iha instituisaun Ministeriu da Saude, tanba ne’e mak ita sosa karreta laos dehan indika ba ema, indika ba ida ne’e, labele.”

“Tanba karreta operasional, karreta sira ne’ebé tantu Sua Exelensia ministra nian, sua exelensia Vise sira nian, tantu to’o mai ami dirijente sira, uza ba karreta operasional. Tanba ne’e mak ita la indika dehan karreta ne’e sosa mai ba Antonio ka Maria, karreta sosa mai Ministériu da Saude i karreta ba operasional servisu nian,” nia afirma.

Narcicio esplika, sira deside sosa karreta Land Cruiser tanba karreta operasional 50 iha MS mak ninia diferensiasi zero ona no nia manutensaun folin boot maibé sira nafatin uza.