Diretór Investigasaun Komisaun Anti Korupsaun (KAK), José Verdiál hatete katak dezde ninia ezistensia iha 2010 to’o ohin, KAK hasoru limitasaun rekursu umanu no seidauk iha edifisiu rasik.

“Tinan kotuk ami rejista kazu 102 no keixa hamutuk 90,(maibé) ami rekursu la to’o atu halo averiguasaun ba kazu no keixa sira ne'e, tanba iha investigasaun iha ema na'in neen de'it .Ami atu rekruta ema maibé ema sira atu mai tuur iha ne'ebé?tanba KAK seidauk iha edifisiu propriu, ne'e sai dezafiu ba KAK,” dehan José ba jornalista sira, iha edifisiu KAK, Farol, Sesta (20/02).

Ba oin, nia dehan, sei esforsu atu tau konsiderasaun ba asuntu sira ne'e, nune'e bele fó atendimentu públiku ba komunidade ho di'ak liu tan, no bele halais liu tan prosesu investigasaun ba kazu sira nomos halais liu tan averiguasaun ba keixa.

Iha fatin hanesan, Komisariu KAK, Rui Pereira dos Santos hateten, maske hasoru limitasaun, KAK kontinua esforsu atu halo investigasaun ba kazu korrupsaun ho transparente.

"Entermus investigasaun kriminál, dezde KAK iha, ha'u hanoin kazu lubuk boot ida ita finaliza ninian investigasaun, ita haruka ba iha Mínisteriu Públiku,” dehan Rui.

Nia rekonese katak, sosiedade  sivilsempre hato’o kritika katak KAK serbisu kle'ur ona maibé seidauk lori ema ba prizaun.

"Maibé imi haree kazu korrupsaun ne'e to'o iha prizaun ne'e la monu husi lalehan. Prosesu ne'e husi ne'e mak to’o iha ne'ebá, ba to’o Tribunál ne'e," dehan nia.

Maske nune’e, tuir nia, dezafiu sempre iha, tanba KAK ho rekursu limitadu no limitasaun finanseira labele halo buat hothotu.

“Maibé ita tenta atu hala’o serbisu tuir mandatu lei fó ba KAK," nia afirma.

Ba susesu ne’ebé KAK hetan, tuir Komisariu ne’e, susesu  boot ba KAK mak iha tinan kotukpartisipa  enkontru Estadu iha United Nations Convention Against Corruption (UNCAC) Doha, Qatar,no enkontru ASEAN relasiona ho asuntu anti-korrupasaun, iha Malázia.

Aleinde ne’e, Komisariu Rui hatutan, ba servisu inspesaun no monitorizasaun durantene’e lao ho di’ak.

"Ita iha deskobrimentu lubuk ida ne'ebé mak ita hetan, ita sei haruka relatóriu ba Ministeriu relevante, ba Parlamentu no mós ba Governu, na'i Primeiru Ministru, agora iha faze edisaun," katak nia.

Iha parte dezenvolvimentu institusionál, nia informa, dadaun ne'e KAK iha ona server, liu-liu ba deklarasaun rikusoin.

Kona-ba infrastrutura,daudaun ne’e KAK hetan apoiu husi Ministeriu Planeamentu no Investimentu Estratejiku atu konstrui uma. Empreza husi Malázia halo ona dezeñu ba edifisiu andar lima ne'ebé sei konstrui iha  Palapasu, besik sede partidu UDT.

Komisaun informa mós katak, KAK lansa sistema keixa online ho naran Denunsia Publika, ne’ebé ho objetivu atu fasilita sidadaun sira hodi hato’o keixa via online.