Portavoz Sentru Intergradu Jestaun Krize (SIJK), Sergio Lobo informa, dadús horisehik (11/4), hamutuk na’in 64, ohin (12/4), aumenta tan ema na’in 52.

Teste laboratóriu ba suspeitu 116 ne’e, ema na’in rua maka pozitivu, ida kazu foun oras ne’e hela iha sala izolamentu Vera-Kruz, no ida seluk rekooperadu tanba teste laboratóriu dala rua hatudu negativu, maibé sei kontinua kuarentena iha nia uma.

“Teste laboratoriu hatudu ema na’in 52 maka negativu, no na’in 64 maka sei hein hela rezultadu,”dehan nia, liu husi konferensia imprensa, iha CCD, ohin.

Sergio informa, ema sira ne’ebé sei iha hela konfinamentu obrigatoriu hamutuk ema na’in 764, no ema sira ne’ebé sai ona husi kuarentena hamutuk na’in 1140.

Hakarak atu apela ba sidadaun hotu ne’ebé hela iha kuarentena atu kontinua mantein disisplina, durante periodu kuarentena ida-idak iha ninia kuartu labele vizita malu, labele halo konversa, kanta, toka, se la’e bele lori efeitu boot ba sosiedade Timor-oan tomak.