Kardeál ne’ebé partisipa iha Konklave hodi hili Papa foun ne’e hamutuk na’in 133, ne'ebé mai husi mundu tomak.

“Suar metan ne’e sai iha tuku 21:00 oras Vatikano, no iha Timor-Leste iha tuku haat liu minute balun oras Timor-Leste,”Online ne’e sita iha Vatican News, kinta ne’e (08/05).

Hafoin hein kleur, fiar-na'in besik rihun 50 iha Prasa São Pedro haree suar metan mosu hafoin votasaun dahuluk. Aban (ohin) votasaun sei kontinua.

Nune’e ho rezultadu ne’ebé seidauk iha, ba loron dahuluk, Kardeál sira sei hasoru malu fali iha kinta dader, loron 8 fulan-Maiu, iha tuku 10:30 dader oras Vatikanu, Roma, no tuku 17:30 otl, hodi kontinua Konklave ho boletin votu rua tan.

“Se laiha ema ida maka eleitu, votasaun rua tan maka ajenda ona ba loraik," dehan Komunikadu ne’e.

Tanba ne’e, kinta ohin, Kardeál sira kontinua halibur malu iha Kapela Sistina hodi hili Papa foun.

Enkauntu, atu hili Papa foun minimu hetan votu 2/3 ka 89 husi Kardeál eleitor sira.