“Governu, liu-liu Ministeriu Saúde, di’ak liu ho lalais prosesa ona vasina ne’e mai atu nune’e ita-nia oan sira ne’ebé tinan 17 mai kraik bele hetan vasina hodi bele redus moras ne’e afeta sira,” dehan nia via telefone, sabadu (11/09).

Nia hatutan, maske vasina seidauk to’o, maibé tuir dadus ne’ebé SSM Manatuto rejista, labarik idade tinan 12 to’o 17 ne’ebé prontu simu vasina Pfizer hamutuk rihun 7.

“Karik Ministériu Saúde ho Organizasaun Mundial Saúde iha ona kbiit atu bele responde ita-nia oan sira ne’e, bele prosesa ona, tanba ami prontu, preparadu bele fó ba ita-nia oan sira,” dehan nia.

Iha parte seluk, Diretor Servisu Autonomu Médikamentu no Ekipamentu Saúde (SAMES), Santana Martins hatete, daudauk ne’e armajen nasionál instala ona eletrisidade hein de’it bainhira mak Covax Facility fó aviza atu lori jeleira mai.

“Pasu tuir mai mak bainhira jeleira ne’e to’o ita sei koko eletrisidade durante semana rua, hafoin ita haree se nia kondiasaun prontu ona atu lori mak ita sei fó informasaun ba Ministériu Saúde atu bele lori vasina Pfizer mai,” dehan nia.