Diretór Ezekutivu interinu FONGTIL, Inocencio de Jesus Xavier avalia katak kazu ne’e iha indikasaun konflitu interese, nepotizmu, no koluzaun ne’ebé presiza halo teste legál.
Tuir nia, polémika hahú ho alegasaun promosaun no aumentu saláriu ba pesoál protokolu INSS nian to'o dala tolu iha tinan ida.
“Agora avaliasaun dezempeñu normalmente tinan ida dala ida, tuir regra. Ha'u la hatene sira-nia lei ida ne'ebé hatete, fó kompeténsia ba Prezidente INSS atu promove nia ajente administrasaun ida, institutu autonomu ida, tinan ida avaliasaun dala tolu,” dehan Inocencio ba Jornal INDEPENDENTE, iha Farol, Kinta (22/01).
Normalmente, nia dehan, avaliasaun dezempeñu ne'e bele halo tinan ida dala ida, no bainhira nia hatudu prestasaun no rezultadu servisu, bele promove nia eskalaunno saláriu.
Alegasaun nepotizmu no koluzaun
FONGTIL mós destaka alegasaun konflitu interese relasiona ho Ministra nia oan ne’ebé servisu iha INSS.
Inocencio konsidera, kondisaun refere iha potensia ba pratika nepotizmu no koluzaun.
“Tanba sa mak Ministra nia oan tenke servisu iha diresaun ida ne'ebé iha supervizaun MSSI?,” nia kestiona.
Tuir Inocencio, se iha ona koluzaun, sei promove nepotizmu no korupsaun.
"Tuir lei hatete ha'u hanesan Ministru ka Diretór ida ha'u labele bolu ha'u-nia família atu mai servisu hamutuk ho ha'u iha fatin ida ne'e, sa tan iha relasaun raan," nia hatete.
Tan ne’e, tuir nia instituisaun kompetente sira hanesan Inspesaun Jeral Estadu bele haree asuntu ne’e no karik labele rezolve husu ba Komisaun Anti Korrupsaun (KAK) atu loke prosesu investigasaun
"Ha'u hanoin tenke loke prosesu.Bolu Ministra, bolu (eis) Prezidente INSS, inklui (Ministra) nia oan sai testamuña ba prosesu ida ne'e. Inklui funsionáriu protokolu ne'ebé (eis) Prezidente INSS promove dala tolu iha tinan ida nia laran."
Entretantu, Diretór Asosiasaun HAK, Feliciano da Costa Araújo hatete, parte ne’ebé sente sai vítima ba desizaun ne’e iha direitu atu hato’o keixa.
"Se (eis) Prezidente INSS rasik sente katak ida ne'e vióla ninia direitu, ha'u hanoin, ba ami, dalan ida mak ne'e nia tenke hato'o keixa," katak nia.
Nia hatutan, maioria nomeasaun no ezonerasaun ba kargu estratejiku sira ne’e nu’udar desizaun politika laos desizaun profisionál.