Ofisialmente, segunda ohin (25/5), membru Governu na’in lima ne’ebé husu ona rezignasaun mak hanesan, Ministru Negosiu Estrajeiru no  Kooperasaun, Dionisio da Costa Babo Soares; Ministra Edukasaun, Ensinu Baziku, Juventude no Desportu, Dulce de Jesus Soares, Vise Ministru Administrasaun Estatal, Abilio José Caetano; Sekretariu Estadu Kooperativa, Arsénio Pereira da Silva; no Sekretariu Estadu Juventude no Desportu, Nelio Isaac Sarmento.

Entretantu, membru Governu na’in rua, hanesan Ministru Estadu Prezidensia Konsellu Ministru, Hermenegildo Augusto Cabral Pereira no Sekretariu Estadu Arte no Kultura, Teofilo Caldas seidauk hatene sira nia desizaun ruma tuir orientasaun parrtidu CNRT.

Enkuantu, Vise Ministra Finansas, Sara Lobo Brites deside hakarak mantein iha VIII Governu lideradu husi Primeiru Ministru Taur Matan Ruak.

Hafoin hasoru malu ho Primeiru Ministru, Ministra Finasas Interina Sara Lobo Brites hatete, deside mantein iha Governu.

“Ha’u deside ha’u nia an nafatin hanesan Vise Ministra Finansas Interina,”dehan Sara, iha Palasiu Governu, ohin (25/05)

Iha fatin hanesan Presidente Conselu Politika Nasional (CPN), Dionisio Babo Soares hatete, nia parte ko’alia de’it ninian no desizaun kolektivu partidu nian ba sira seluk ne’e konforme idak idak nian.

“Ministra Finansas (Interina) ha’u lakoi ko’alia,tanba ko’alia ba ha’u nian an no nomos ko’alia ba desizaun kolektiva partidu nian,”dehan Babo.

Antes ne’e, Presidente Partidu CNRT, Kay Rala Xanana Gusmão liu husi konfrensia imprensa hatete ona katak Membru Governu ne’ebé nomeia no indizita husi partidu sei husik  VIII Governu ohin 25 fulan ne’e.