Print this page

Serka Sanitaria iha Munisipiu Haat Mantein, Hakotu iha RAEOA

By Saturnina da Costa Setembru 08, 2021 613
Konsellu Ministru ne'ebe diriji husi PM Taur Matan Ruak. Foto:Dok/Independente. Konsellu Ministru ne'ebe diriji husi PM Taur Matan Ruak. Foto:Dok/Independente.

DILI: Governu liu husi reuniaun Konsellu Ministru (KM) deside mantein serka sanitaria iha Munisipiu haat hanesan Dili, Baucau, Ermera no Kovalima to’o loron 22 fulan-Setembru tinan 2021.

Desizaun ne’e Governu foti hafoin halo analiza ba aprezentasaun husi Sala Situasaun Sentru Integradu Jestaun Krize (SIJK) kona ba pontu situasaun epidemiolójika iha país.

Nune’e, Governu mós impoin serka sanitária iha Munisípiu Manufahi, ne’ebé vigora to’o loron 15  fulan-setembru tinan 2021, la iha alterasaun.

“Bandu nafatin ema tama no sai husi Munisipiu Baucau, Kovalima, Dili, Ermera no Manufahi, exetu tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian,”dehan Ministru Prezidensia Konsellu Ministru Fidelis Leite Magalhães, iha Salaun Ministeriu Finansas Aitarak-Laran, kuarta ohin (08/09).

Entretantu, proibisaun ida ne’e la abranje ba indivíduu sira ne’ebé komprova ona vasinasaun kompleta (doze rua) kontra Covid-19 nian, nune’e mós ba labarik sira ho tinan neen mai kraik ne’ebé akompaña indivídu refere.

Enkuantu, Governu mós hakotu ona impozisaun serka sanitaria iha aréa sira ne’ebé abrajen husi Suku Naimeko, Postu Administrativu Pante Makassar no husi Suku Bobometo, Postu Administrativu Oesilu, Suku rua ne’e iha Rejiaun Administrativa Espesiál Oekusi  Ambenu (RAEOA) nian, to’o tuku 23:59, husi loron 8 fulan-setembru tinan 2021.

Rate this item
(0 votes)