Tuir Ministru Prezidensia Konsellu Ministru, Fidelis Leite Magalhaens hatete, Governu aprova mós projetu Rezolusaun Governu nian ne’ebé mantein impozisaun serka sanitária iha Munisípiu Baukau no Vikeke ba loron hitu (7) tan.

"Konsellu Ministru deside aumenta tan serka sanitaria ba munisipiu Baucau no Vikeke ba loron 7 tan,"dehan nia iha konferensia imprensa iha Palasiu Prezidente (08/04).

Nune’e, sei kontinua bandu sirkulasaun ema nian entre munisípiu sira ne’e no munisípiu sira-seluk, exetu iha kazu sira ne’ebé ho fundamentu forte tanba razaun sira hanesan seguransa públika, saúde públika, asisténsia umanitária, manutensaun husi sistema sira ba abastesimentu públiku ka ba realizasaun interese públiku nian.

Governu deside la halo renovasaun ba impozisaun konfinamentu domisiliáriu jerál ba populasaun iha Baukau no Vikeke. Molok ne’e, Konsellu Ministru prolonga serka sanitária ba dala-3 iha munisipiu Baucau no Vikeke hahú iha oras 23:59 loron 2 fulan abril too oras 00:00 loron 9 fulan abril tinan 2021.

Jornalista: Saturnina da Costa

Editor: Jose Sarito Amaral