Print this page

Serbisu Edukasaun Dili Husu Eskola-sira Labele Husu Propinas 100%

By Adelaide dos Santos Setembru 07, 2021 634
Estudante sira iha eskola Nikolau Lobato Comoro Dili. Foto:Media Sosial. Estudante sira iha eskola Nikolau Lobato Comoro Dili. Foto:Media Sosial.

DILI: Serbisu Edukasaun Munisipiu Dili, apela ba eskola-sira iha munisípiu nee atu labele husu propinas 100% ba estudante-sira, durante implementasaun Konfinamentu Domisiliáriu Jerál.

“Ho situasaun ida nee ita suspende tiha atividade eskola, nunee bele evita transmisaun Covid-19. Tanba nee, apela ba eskola privada sira liuliu eskola Katólika, eskola komunidade, international school-sira labele husu propinas 100% ba inan aman-sira,” Diretór Serbisu Edukasaun Munisipiu Dili, Duarte Braganza, hateten iha nia serbisu fatin Comoro, sesta (03/09).
Serbisu Edukasaun Munisípiu Dili simu ona dadus balun husi eskola privada sira, katak, sira la selu 100%, maibé nafatin halao prossesu aprendizazen, nunee husu ba inan aman-sira atu selu propinas ho metade.
Nia fó ezemplu iha eskola Ensinu Sekundária Nicolau Lobato, kada fulan selu propinas $6, maibé ho situasaun ida-nee kada fulan sira husu ba inan aman-selu deit $3, inklui internasional school balun.
Profesór-sira rezumu rasik matéria
Parte Serbisu Edukasaun Munisípiu Dili mós organiza oinsa hamosu inisiativa rasik hamutuk ho profesór-sira atu halo rezumu ba matéria estudante sira-nian.
Inisiativa nee mosu tanba durante nee iha preokupasaun baran husi estudante sira relasiona ho programa eskola ba uma neebé laiha benefisiu ba sira.
“Ministériu Edukasaun Juventude no Desportu (MEJD) estabelese programa eskola ba uma (online), maibé ida-nee sai preokupasaun boot ba etudante no inan-aman sira, entaun ho inisiativa rasik hau hamutuk ho professór eskola-sira halo rezumu ba matéria, nunee fasilita estudante-sira hodi estuda,” nia hateten.
Programa neebé mak governu estabelese ba estudante sira kona-bá eskola ba uma, sai difikuldade boot ba estudante-sira hanesan balun agora daudaun iha fatin izoladu, liña eletrisidade laiha, telivizaun, telephone android inklui mos rede internet la dun diak.
Iha sorisn seluk, Joana Ferreira neebé ninia oan oras nee halao estudu iha eskola Nicolau Lobato Dili, sente triste tanba nia oan lakon matéria husi eskola, maibé inan aman kontinua selu nafatin propinas.
“Triste tebes tanba iha situasaun ida-nee atividade eskola laiha no ami nia oan sira lakon sira nia matéria, la aprende buat ida maibé parte eskola kontinua husu nafatin propinas,” nia espresa.
Profesór iha Dili 60,38% Simu Ona Vasina
Tuir dadus neebé Serbisu Edukasaun Munisípiu Dili rekolla, totál profesór iha munisípiu Dili, hamutuk 60,38% mak simu ona vasina kontra Covid-19, kompostu husi Ensinu Pré-eskolár too Ensinu Sekundária Jerál (ESG), inklui Ensinu Tékniku Vokasionál (ESTV).
Totál Profesór iha Dili hamutuk 3.153 kompostu husi Ensinu Pre-eskolár too Ensinu Sekundária Jerál, inklui Ensinu Tékniku Vokasionál.
Husi númeru nee, professór hamutuk 1.904 (60,38%) mak simu ona vasina no 1.249 (39,62%) mak seidauk simu vasina.
“Persentajen nee ekivalente ho númeru 1.904, apela nafatin ba profesór-sira tenke simu vasina, inklui ba ita nia estudante sira neebé tinan 18 ba leten atu nunee, bainhira Governu reativa prossesu aprendizazen labele fó impaktu ba sira,” Duarte Braganza husu.
Kona-bá profesór-sira neebé seidauk vasina, bainhira MEJD reativa prossesu aprendizazen tenke hatudu uluk atestadu médiku, nunee sira bele hatene, no profesór-sira nee tenke submete ba Governu tanba la kumpre ona regra Ministériu Saúde-nian, labele hanorin estudante-sira no sei tau falta.

Rate this item
(0 votes)