Xefe Aldeia 12 de Outubro, Plasidio Marçal hatete, apoia ne’e hanesan kontinuasaun ba komunidade ne’ebé durante ne’e seidauk hetan.

"Iha momentu ne'ebá material sira ne'e hotu no naran sei ezisti hela, ida ne'e mak agora dadaun SEPS ho world Vision mai kompleta fali naran husi Komunidade Aldeia 12 de Outobru hamutuk na’in 373,”dehan nia ba online INDEPENDENTE iha Aldeia 12 Outubru Tasi-tolu, tersa (14/09).

Nia hatutan, nesesidade bazika ne’ebé SEPS ho WVTL oferese ba komunidade 373 mak hanesan, fos mina, manu tolun, ikan lata.

Aleinde ne’e, iha mós material dapur nian hanesan, sanan, tasu, bikan-kanuru, balde, terpal, no biti.

Nune’e, kada uma kain ida sei hetan fos saka 1, mina Bimoli 2  ltr 1, sanan 1, tasu 1, bikan 10, kanuru 10, terpal 1, baldi 1, no mós sasan rahun sira seluk.

Nia informa, total xefe familia iha Aldeia 12 de Outubro hamutuk 2.264, nune’e bainhira akontese inundasaun Governu apoia ona uma-kain 1.670.

Iha loron 14 fulan-Setembru sira kompleta tan uma-kain 373 no restante sei iha prosesu, maibé depende ba programa husi SEPS  karik iha ona rezultadu positivu, sira indika tun mai Xefe Aldeia hafoin fó hatene ba komunidade hodi simu sira nia dereitu.

Entretantu, Hermelinda M. Fatima hanesan komunidade, agradese ba Governu ne’ebé ajuda ona sira iha situasaun defisil, hodi responde ba nesesidade uma-laran, maske uituan maibé sira kontente.