SEKomS Expedito Dias dehan, funsaun ka papel ofisial media nian maka primeiru, oinsa hakerek komunikadu imprensa, segunda ofisial media ida bele rekolla dadus hodi bele oferese ba membru governu, atu nune’e membru governu sira ba halo enkontru ruma, hanesan reuniaun Konsellu Ministrus ou halo enkontru kona ba ministeriu ida nian, membru governu ne’e iha ona dadus atu bele koalia.
“Servisu prinsipál ne'ebé ofisiál media sira halo maka tenke halo komunikadu imprensa iha Ministeriu ida-idak nian ho kualidade, tanba komunikadu imprensa halo ho objetivu oinsá lori informasaun ba liña Ministerial sira nia servisu loron loron nian, ba públiku liu husi pajina ministeriu nian,”dehan nia ba Jornalista sira, iha Salaun Maria Goreti-SEI, Kaikoli, Dili, Tersa ne’e (29/07/25).
Governante ne’e esplika, servisu jornalista ho ofisial media nian diferente, tanba jornalista nia papel maka kada loron rekolla informasaun sira hodi fó sai ba publiku, liu husi meus komunikasaun sosial sira. Enkuantu, ofisial media sira nia papel maka atu atualiza informasaun sira ba ninia superior.
“Iha diferensia entre jornalista ho media officer, defisinisaun jornalista maka ema ida ne’ebé loro-loron sai ba buka informasaun, no hakerek hodi prosesu ba iha edisaun, depois fó sai iha meus komunikasaun sosial, ida ne’e maka definisaun jornalista. Definisaun media officer maka oinsa nia bele atende infomasaun ba nia superior, hanesan ministru ou sekretariu estadu,”tenik nia.
Entretantu, Sekretariu Estadu Komunikasaun Sosial haktuir tan katak, servisu jornalista la’ós kabe ba ofisial media, media ofisial servisu iha liña ministerial ne’ebé sira servisu ne’e, atu bele hetan informasaun iha ministeriu ne’e, hodi bele oferese ba superior atu superior uza ida ne’e atu bele koalia ba jornalista.
Tanba, dala-ruma hanesan superior husi instituisaun ida ba partisipa atividade nasionál ka eventuál ruma, ofisiál mídia tenke hasai de'it ninia superior nia foto hotu fila ona ba liur, la'ós okupa fali servisu jornalista nian, tamba iha atividade sira ne'e sempre destaka jornalista nasionál hodi halo kobertura.