“Kuandu hetan traballadór Timor-oan sira involve an iha arte-marsiais iha Korea do Súl, Governu sei la tolera sira-ne’ebé komete krime,” Dehan Sekretáriu Estadu Formasaun Profisionál no Empregu, Rogério Araújo Mendonça, ba Jornalista sira iha City 8 Manleu, Segunda (09/03).

Maske nune’e, nia dehan, parte Embaixada Timor-Leste iha Korea do Súl ho Adidu Traballu Timor-Leste seidauk fó informasaun mai SEFOPE kona-ba kestaun ne’e.

"Ha'u fiar katak traballadór Timor-oan sira involve duni arte-marsiais no la’os kompañia sira haruka ba servisu iha ne'ebá, maibé liu husi Governu mak haruka traballadór Timor-oan sira ba servisu iha Korea do Sul,” Nia hatete.

Tanba ne'e, antes sira atu sai Timor-Leste ba servisu iha rai li’ur no sira iha kompromisu asina deklarasaun parte família traballadór no traballador ho Governu liu husi SEFOPE.

“Kuandu hetan aktus kona-ba traballadór Timor-oan sira involve krime iha liur, Governu sei la tolera traballadór,” Nia haktuir.

Kona-ba traballadór sira ne’ebé mate iha Korea do Súl, nia afirma, SEFOPE halo koordenasaun ho parte F-FDTL Naval no Koordena ho UPM hodi fó formasaun ba kandidatu Timor-oan kona-ba área tasi nian.

“Nune'e sira tuir formasaun semana ida hodi hatene atu uza ekipamentus husi tasi laran nian durante fulan nia laran mak foin ba servisu iha Korea do Súl,” Nia hakotu.