Hanesan asaun solidariedade ida ne’ebé restaurante Delicious ho Uma Lafatik hatudu ona hodi apoiu hahan gratuita ba vitima inundasaun impaktu husi udan no anin boot ne'ebé akontese iha iha loron 4 fulan-Abril 2021.

Na'in ba Retaurante Delicious, Cesario Trinito Freitas Gaio, konfesa katak, restaurante refere kria inisiativa hodi halo asaun solidariedade apoiu hahan ba vitima inundasaun sira, tanba komunidade barak mak lakon sasan, lakon hahan, uma, no ema.

Retaurante Delicious durante ne'e ajuda ona ema barak, kada semana sempre fó apoiu hahan ba iha komunidade sira ne'ebé presiza.

Apoiu ne’e laos foin akontese ba vitima inundasaun sira, maibé sempre fó apoiu umanitária ba komunidade sira ne’ebé presiza hahan no komunidade sira ne’ebé presiza sasan.

"Delicious halo bebeik, ami halo iha Maubisi, lor-loron ema 500 to'o 600 semana ida. Ba merkadu Taibesi maioria ami halo gratuita inklui mós ho ida ne'e mós atividade ida ne'ebé responde emerjensia ba iha inundasaun nian,"dehan nia ba online Independente, sesta horsehik, iha nia servisu fatin, Kolmera Dili.

"Ida ne'e asuntu ema hotu nian. ami hakarak halo de'it”.

Husi inisiativa ba asaun solidariedade ne’e hetan apoiu inisiu husi kolega traballador sira husi rai liur, emprezariu sira inklui NGO balun hodi ajuda sira fó osan sasan dapur nian ne'ebé restaurate Delicious presiza.

Tanba ne’e kada loron Delicious hasai osan dolar amerika $1,500 hodi sosa material dapur nian liliu ba sasan hodi tein nian.

"Loron primeiru hasai rasik Delicious nian ba ema rihun 1,700. Depois númeru aumenta aviza ba maluk sira, depois maluk sira husi rai laran no mós rai liur haree ami halo inisiativa di'ak entaun sira ajuda ami ho osan dolar amerika rihun $5, maibé ema aumenta barak hakarak, entaun sira aumenta to'o ona dolar amerika rihun $37,”dehan nia.

Delicious ajuda la'os fatin ida de'it maibé ba komunidade sira hotu liliu ba vitima inundasaun sira, sira rasik mak mai foti hahan iha fatin Delicious nian.

"Barak loos iha loron primeiru segundu ami la halo lista horseik (kinta) ba kalan hetan uma kain 80 ne'e ida ne'ebé iha sira nia uma de'it. Sira ne'ebé iha IDP (fatin evakuasaun) ne'e sura ketak ona ne'e tama ona iha ribuan ona. Dom Bosco mós ba Bidau, Becora, Hera, Manleu Tasi Tolu maioria mai foti hahan iha ne'e,"dehan nia.

Kada loron Delicious apoiu hahan dala rua ba komunidade sira hahú husi tuku 11:30 ba meudia no kalan nian.

"Dadersan matabisu ho meiudia ami gabung de'it. Sira mai foti kolak, paun ho mantolun. Kalan etu ho modo. Horseik (kuarta) ema hamutuk rihun 7 no ohin (kinta) ami esforsu sei bele liu rihun 7,"dehan Cesario.

Planu Delicious nian ba ajuda vitima sira to'o sesta kalan. Fiar katak semana ida ne'e bele ona fó oportunidade ba ema hodi rekupera.

Iha sorin seluk Nain ba Restaurante Uma Lafatik, Francisca Sang akresenta, Uma Lafatik apoiu hahan loron ida dala ida, apoiu tein husi maluk sira husi organizasaun no mós komunidade sira.

Maibé Uma Lafatik la'os deit apoiu hahan maibe sasan balun mós hodi ajuda vitima inundasaun sira ne'ebé iha CVTL, Infordepe, Liceu, Hera, Tasi Tolu, Manleu, no Metiaut.

"Dadaun ne'e ha'u fokus de'it ba alimentasaun, maibé komunidade organizasaun balun lori roupa, sasan bebee nian, aimoruk, biti, manta kolisaun, entaun ami lori ba la'os hahan de'it. Loron primeiru ami suporta 500 kotak, segundu 900 kotak horseik kotak rihun 1. Lor-loron numeru aumenta,"dehan nia.

Nia dehan apoiu ida ne'e sei kontinua nafatin maibé depende mós ba númeru refuziadus karik presiza nafatin ajuda, Uma Lafatik sei nafatin apoiu.

"Ami depende de'it, to'o bainhira mak sira bele fila fali ba sira nia hela fatin,"dehan nia.

Parabens no Apresia ba Imi Nia Asaun Solidariedade!

Jornalista: Julia da Costa

Editor: Jose Sarito Amaral