Tuir informasaun, diskusaun sira durante enkontru ne’e inklui kontribuisaun boot Portugal nian iha dezenvolvimentu setór justisa Timor-Leste iha tempu hirak liu ba, ne’ebé kontinua sai hanesan pilar importante iha konsolidasaun instituisaun judisiária iha rai laran.

Antes vizita ne’e, Xanana hatete katak, objetivu prinsipál husi sira-nia enkontru ho autoridade judisiál Portugal la’ós atu asina akordu foun, maibé atu husu no sensibiliza tan apoiu kontinua ba dezenvolvimentu sistema justisa Timor-Leste.

Nia mós subliña katak dezafiu ida ne’ebé kontinua mosu mak problema ligasaun lian portugés iha prátika judisiál.

Vizita ofisiál ne’e inklui mós enkontru ho Prokuradór Jerál Repúblika Portugal, no ema hirak iha área edukasaun hanesan reitór no diretór fakuldade direitu iha universidade Portugal nian. Aleinde ne’e, Primeiru Ministru hasoru mós estudante Timor-oan sira ne’ebé estuda direitu iha Portugal.

Iha ajenda ne’e, Xanana sei simu mós Prémio Professor Doutor Jorge Miranda iha Universidade Lisboa, hanesan rekoñesimentu ba kontribuisaun ba konstitusionalizmu no konstrusaun kuadru jurídiku Timor-Leste nian.

Vizita ne’e reflete prioridade Governu Timor-Leste nian atu kontinua hametin sistema judisiál no aumenta kooperasaun ho Portugal no parseiru lusófona sira, hodi suporta konsolidasaun estadu de direitu iha nasaun.