Print this page

PSHT-IKS-KORK Prontu Kopera ho Governu Featured

By Fevereiru 21, 2020 2674
Pedro Aparicio Pedro Aparicio

DILI:Organizasaun arte-marsiál tolu kompostu husi Ikatan Kera Sakti (IKS) Persaudaraan Setia Hati Terate (PSHT) no Kmanek Ona Rai Klaran (KORK), prontu koopera ho governu atu rejistu hodi hetan lisensa.

Lider másimu PSHT, Pedro Aparício hateten, governu aprova ona revogasaun husi rezolusaun governu no 16/2013, kon-ba bandu grupu arte-marsiál, tanba ne’e sira prontu koopera ho governu atu rejistu hodi hetan lisensa.

“Ami agradese ba Governu bele reativa fali ona grupu arte-marsiál tolu ne’ebé mak governu antes ne’e hasai rezolusaun hodi taka. Tanba ne’e, agora loke fali ona ami prontu koopera atu rejistu hodi hetan lisensa,” dehan nia, via telemovel.

Nia dehan, problema ne’ebé durante akontese ligadu ba arte-marsiál sai hanesan lisaun ida, maibé ba oin governu deside loke fali ona arte-marsiál sira prontu koopera ho governu atu kontribui ba pás no estabilidade iha Timor-Leste.

“Ami sei mai ho paradigma foun ho hahalok ida foun no organizasaun sira hotu tenke hakribi ba violénsia para bele lori dame no hakmatek iha ita-nia rain”, tenik nia.

Ne’e duni, Pedro apela mós ba membru PSHT, IKS no KORK hotu-hotu atu hakmatek labele halo arbiru, tanba lider sira husi arte-marsiál sei halo mudansa atu bele kontrola nia membru sira iha nasionál too iha baze.

Nune’e, sei koopera ho PNTL no autoridade lokál sira iha suku atu bele halo sosializasaun hodi kontrola atividade arte-marsiál sira hotu ne’ebé eziste iha Timor-Leste. Entretantu, lider másimu IKS, Silvestre Xavier Sufa Efi hateten, Governu iha hanoin di'ak atu loke hikas fali organizasaun arte-marsiál ne’ebé governu antes ne’e taka.

Tanba ne’e, ba oin arte-marsiál sira prontu simu atu loke fali. Nia dehan, maski loke ona, maibé husu ba arte-marsiál hotu labele halo tuir nia hakarak, tenke rona governu atu ba rejistu iha hodi bele hetan lisensa hafoin halo atividade.

Tanba ne’e, atu labele hamosu problema ba sosiedade maka arte-marsiál hotu tenke la’o regulamentu ne’ebé Estadu fo sai ona.

Rate this item
(0 votes)
Jose Sarito Amaral

Latest from Jose Sarito Amaral