Tuir Diretór EBF 12 Outubru Tasi-Tolu, Fernando Barreto hatete, tuir informasaun ne’ebé eskola ne’e simu katak orsamentu ba programa merenda eskolar seida’uk hetan transferensia.

“Ami simu informasaun husi EJP katak konaba merenda eskolar ba Q3 nian hein uituan, tanba sei iha prosesu nia laran, maibé ami la hatene dia hira mak ami bele hetan informasaun klaru, merenda eskolar paradu semana ida resin ona, tanba dehan osan seidauk sai,”dehan nia ba Jornalista Online INDEPENDENTE, iha nia knar fatin, EBF 12 Outubru Tasi-Tolu, Segunda (14/07/25).

 Dirijente Eskola ne’e hatutan, iha eskola refere, kada estudante asesu ba programa merenda eskolar ho montante dolar amerikanu 0,35 centavus no menu ne’ebé maka estudante sira konsumu bazeia orariu implementasaun nian.

“Kada loron estudante sira han maka 0,35 centavus no menu maka hanesan, etu ho naan, manutolun, no aifuan sira hanesan hudi, masan ka apple no seluk tan, depende ba ekipa ne’ebé sosa no hein fornesedor implementa deit,”tenik nia.

Iha sorin seluk, Diretór EBC 30 Agostus, Baltazar Boremeu hatete, tuir informasaun husi ekipa jestaun programa merenda eskolar katak, orsamentu ba implementasaun programa merenda eskolar faze datoluk nian, seida’uk tama iha konta bankaria EJP nian.

Nune’e, Dirijente eskola ne’e husu ba Governu liu Autoridade Munisipal Dili atu  bele halo transferensia orsamentu ba konta bankaria EJP nian hodi kontinua implementa programa refere.

“Ami husu ba autoridade munisipal Dili oinsa para bele transfere osan ne'e ba bankaria EJP sira nian, para EJP sira foti lalais atu kontinua programa merenda eskolar ne'e ba oin,”haktuir Dirijente EBC 30 Agostus.

Entretantu, tuir dadus, total estudante iha EBF 12 de Outubru hamutuk 2.097 no iha EBC 30 Agostus hamutuk rihun ida resin.

Enkuantu, total orsamentu ne’ebé Governu liu Ministeriu Administrasaun Estatal aloka ba iha programa merenda eskolar tinan 2025 ho montante milaun $34.