Reprezentante United Nation International Children Fund iha Timor-Leste Bilal Aurang Zeb Durrani hatete, Atividade eskola paradu desde iha tinan kotuk to’o agora, ida ne’e fó impaktu ba estudante sira nia futuru oin mai.

Tanba ne’e, Governu liu husi Ministeriu Edukasaun Juventudi no Desportu (MEJD), estabelese programa eskola ba uma hodi fasilita estudante sira atu bele estuda iha uma, maibé dezafius barak mak sira sei infrenta nafatin.

“Ita hatene katak aktividade eskola paradu desde iha tinan kotuk mai to’o agora, ida ne’e fo impaktu ba ita nia estudante sira, maski estabeles ona eskola ba uma, maibé dezafius barak mak sira sei infrenta, tanba laiha telephone hodi assesu ba internet inklui osan laiha hodi sosa pulsa kada loron,” dehan nia bainhira remata inkontru ho Prezidente Republika, iha Palasiu Prezidensial Bairru Pite, segunda ohin (07/06).

Nune’e, UNICEF sei ajuda MEJD hodi halo despaixu ida ba iha INFORDEPE no Edukasaun Munisipal, atu nune’e bele promove programa eskola ba uma.

Entretantu,  Ministru Edukasaun Juventude no Desportu (MEJD) Armindo Maia hatete, Programa eskola ba uma implementa liu husi Radiu, Telivizaun, Online no youtube, atu nune’e fasilita estudante sira hodi estuda iha uma.

Iha sorin seluk, Lauredo Nobel da Paz José Ramos Horta mós konsidera eskola ba uma ka eskola online la fó benefisiu ba ba estudante sira, tanba estudante barak laiha telephone ne’ebé diak no osan sosa pulsa hodi asesu ba internet.

Horta akresenta, ba estudante pre-primaria no primaria laiha oportunidade atu aprende buat ruma no bele hatete iha deit eskalar pursentu 1.

Tanba ne’e, Ministru Armindo Maia informa ba profesores sira hotu atu simu, atu nune’e iha tempu badak bele reativa fali prosesu aprendizajem prezensial.

Asistente Editor: Saturnina da Costa