Print this page

Professor Iha Dili Hamutuk 812 Simu Ona Vasina Featured

By Saturnina da Costa Jullu 01, 2021 556
Ministru MEJD, Armindo Maia. Foto:Saturnina/Independente. Ministru MEJD, Armindo Maia. Foto:Saturnina/Independente.

DILI:Tuir dadus husi Ministeriu Edukasaun Juventude no Desportu (MEJD) liu husi Diresaun Edukasaun Munisipiu Dili rekolla ona Professor ne’ebé simu ona vasina hamutuk 812.

Tuir Diretór Edukasaun Munisipiu Dili, Duarte Braganza hatete, Diresaun Edukasaun munisipiu Dili simu orientasaun husi MEJD atu akumula dadus husi professor no funsionariu ne’ebé simu ona vasina, hafoin lori ba iha MEJD hodi deside atu bele reativa prossesu aprendijazem.

“Ha’u simu ona orientasaun husi MEJD atu rekolla dadus professor sira ne’ebé simu ona vasina, tanba ne’e, agora dadaun ha’u rekolla ona Professor hamutuk 812,”dehan nia knar fatin Comoro Dili, kuarta ohin (30/06).

Nune’e, ba professor no funsionariu no mós estudante sira ne’ebé simu ona vasina maioria bele reativa hikas prosesu aprendijazem.

Nia hatutan,     total profesor husi nivel edukasaun pre-eskolar to’o ensinu Sekundária Jerál hamutuk 3.153, husi númeru  professor hamutuk na’in 812 mak simu ona vasina, no profesor na’in 2.341 seidauk simu vasina.

Nia informa, tuir dadus total professor husi pre-eskolar hamutuk 183, husi númeru ne’e 149 professor mak simu ona vasina no 34 mak seidauk simu vasina ho nia total estudante hamutuk 6.096.

Nia informa, total eskola iha Nivel Eskola Ensinu Baziku hamutuk 106, estudante 19.993, no total profesor 1.830, husi númeru ne’e professor hamutuk 233 mak simu ona vasina 1.597 mak seidauk simu vasina, Total Eskola Ensinu Sekundariu Jeral iha 22, Estudante hamutuk 24.589, no total profesor 863, husi númeru professor ne’ebé mak simu vasina hamutuk 316,no 547 mak seidauk.

Nia dehan, Total Eskola Ensinu Tekniku Vokasional iha sia (9) ho Estudante hamutuk 4.065 no total Profesor 277, husi númeru ne’e 114 professor mak simu ona vasina no 163 mak seidauk simu vasina.

Entretantu, Ministru Edukasaun Juventude no Desportu (MEJD) Armindo Maia hatete, Durante ne’e governu suspende aktividade ensinu prossesu aprendijazem tanba  ho situasaun pandemia covid-19, ho ida ne’e antes atu reativa fila fali, MEJD husu ba professor no estudante sira ne’ebé mak ho idade 18 ba leten tenke tuir vasinasaun.

“Ha’u hakarak apela ba professor inklui funsionariu sira no mos ba estudante sira ne’ebé ho tinan 18 ba leten, tenke tuir vasinasaun atu nune’e ita bele reativa fila fali ita nia aktividade ensinu prossesu aprendijazem nian, tanba eskola sira ne’ebé mak durante ne’e ita suspende tanba covid-19, ho ida ne’e wainhira professor no estudante sira ne’ebé idade to’o ona tuir vasinasaun entaun ita sei reativa hikas ita nia aktividade eskola nian,” dehan nia iha CCD, foin lalais (22/06).

Nia dehan, MEJD ho esforsu tomak ho kondisaun ida ne’ebé  diak atu nune’e bele reativa hikas prossesu aprendijazem, maibé professor no estudante sira ne’ebé mak idade 18 ba leten tenke tuir hotu vasinasaun.

Nia afirma, Sirkular sai tiha ona husi MEJD katak ba funsionariu no professores sira hotu inklui estudante sira ne’ebé idade 18 ba leten obrigatoriamente tenke simu vasinasaun.

Nia relata, MEJD sei identifika uluk lai ba eskola sira ne’ebé nia persentajem barak ona hodi simu vasina, entaun MEJD reativa hikas sira nia ensinu prossesu aprendijazem no ba eskola sira ne’ebé professor no estudante sira seidauk vasina MEJD sei kontinua suspende nafatin, atu nune’e Ministériu sei foti medida.

Wainhira professor no estudante sira tuir ona vasinasaun entaun iha fulan jullu MEJD reativa hikas fila fali aktividade prezensial ba eskola sira, maibé agora dadaun MEJD sei halo identifikasaun ba eskola sira, atu nune’e bele hatene eskola hira mak professor no estudante sira simu ona vasina no hira mak seidauk.

Enkuantu, tuir rekomendasaun Governu liu husi Ministériu Edukasaun Juventude no Desportu (MEJD) katak atu reativa hikas prosesu aprendijazem, professor hotu tenke simu vasina.

 

Asistente Editor: Saturnina da Costa

Rate this item
(0 votes)