Print this page

Profesora Portuguêza 2 Pozitivu Covid-19 Rekuperadu Featured

By Elsa Belinha Maiu 03, 2020 2689
Atualiazasaun COVID-19 Atualiazasaun COVID-19

DILI: Profesora Portugueza na’in rua (2) iha munisipiu Likisa ne’ebé konfirmadu pozitivu Corona Virus Deasses 2019 (Covid-19) rekuperadu ona.

Portavoz Sentru Integradu Jestaun Krize (SIJK) Doutór Sergio Lobo hatete, profesora portuguêza na’in rua ne’ebé konfirmadu izola iha fatin izolamentu Vera Cruz rekuperadu ona no fila ona ba uma.

“Agora dadaun iha fatin izolamentu Vera Cruz ne’e na’in walu (8) maka sei izola iha ne’eba, na’in 20 maka sai ona,”dehan nia iha konferensia imprensa iha CCD, ohin.

Entretantu, suspeitu sira ne’ebé halo teste laboratóriu hamutuk 688, kazu konfirmadu mantein 24, rezultadu laboratóriu negativu hamutuk 533, ema na’in 131 hein rezultadu laboratóriu.

Ema sira ne’ebé sei iha karantina hamutuk 316 kompostu husi na’in 41 halo karantina iha fasilidade governu nian iha munisipiu sira no na’in 214 karantina iha fasilidade governu nian iha Dili. Ema na’in 61 halo auto karantina iha munisipiu sira.

Total ema ne’ebé liu ona loron 14 iha karantina hamutuk 1898 kompostu husi Dili hamutuk 1476 no iha munisipiu 401.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku.

Hakmatek iha uma kuandu laiha nesesidade ne’ebé importante iha li’ur. Sai ba li’ur tenke uza maskara.

Nia mós informa, bainhira iha sintomas infesaun respiratória aguda (IRA) hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira. Se lakohi atu hetan moras Covid-19 ne’ebé grave ka krítiku halo favor hapara fuma sigaru no hemu tua.

Rate this item
(0 votes)
Last modified on Domingu, 03 Maiu 2020 20:12