Prezidente Liga Futeból Timor-Leste, Ipolito Soares hatete, jogu apuramentu segundu divizaun paradu relasiona ho feriadu natal no ano novu, nune’e mos difikuldade sira hanesan kampu  no arbitrajem.

"Tuir orariu ita komesa iha loron-6 fulan janeiru ne'e, maibe ita iha difikuldade ba kampu, ida ne'e mak atrazu oituan iha oráriu, maibe ohin ita koordena ona ho klubu sira katak, ita sei kontinua fali jogu iha loron-14 fulan ne'e,” katak nia ba jornalista sira, iha sede LFTL Kaikoli, sexta (09/01).

Nia esplika, hafoin enkontru ho klubu sira, LFTL deside jogu apuramentu segundu divizaun sei utiliza kampu rua hanesan kampu Dom Bosco Komoro no Kampu Lalenok.

"Kampu rua ne'e mak oferese ba liga atu uza hodi hala'o jogu kualifiksaun apuramentu segundu divizaun nian, tan ne'e ita sei fahe orariu fiksu ba klubu sira tuir kampu rua ne'e,” Nia haktuir.

Dirijente orgaun liga ne'e subliña, parte federasaun mos rejistu preokupasaun klubu sira nian, kona-ba laiha seguransa iha kampu, hodi asegura bainhira mosu problema ruma.

“Hanesan baibain antes liga la’o, ita halo karta ba parte seguransa sira komprometidu, maibé dala-ruma tanba situasaun, la’os seguransa sira la mai, sira mai haree liu de'it, segundu iha kompetisaun rua la’o dala ida, ne'e mak dala-ruma sira fahe sira nia tempu susar, maibe preokupasaun klubu nian ami rejista, agora ami sei kordena ho seguransa, atu bele ativa fali iha terenu bainhira klubu sira hala’o jogu,"Nia afirma.

klubu balun to'o agora seidauk kompri hatama osan rejistrasaun nian, Ipolito informa, ida ne'e regras administrativu, maibe klubu ida ka rua mak la tuir regulamentu, dala-ruma sira hasoru failansu iha sira nia klubu.

“Ida ne'e mak ita autoriza, la’os dehan la hatama liu, maibe iha rejistrasaun siira hatama uluk 50 porsentu, maibé ohin klubu sira ho orgaun Liga deside katak, loron ohin sira tenke kompleta ona, se la kompleta mak sira sei hetan sansaun,” Nia akresenta.

Reprezenta klubu AD União, Nicolao Castro, husu ba orgaun Liga atu konsidera rekomendasaun  hotu husi klubu sira.

"Ha'u nia rekomendasaun ba orgaun Liga ne'e, tanba sira esforsu tebes, atu hala'o jogu ida ne'e, tanba jogu terseiru divizaun ne'e lakon kleur ona iha 2017, foin mak sira harii fila fali,” Nia hatete.

Maibe, nia mos agradese ba orgaun Liga, maske orgaun Liga hasoru dezafiu oi-oin.

"Ha'u agradese ba komisaun organizadora, maske sira hasoru dezafiu oi-oin, maibe sira konsege realiza jogu ida ne'e ho ekipa hamutuk 40, maibe ida la tuir, ne'ebe hela 39, tan ne'e ha'u rekomenda de'it ba komisaun katak buat ne'ebe ohin deside sira tenke foti desizaun, nune'e klubu sira hotu bele partisipa nafatin,” Nia hakotu.