"Ohin loron hanesan loron sakrifisiu, loron tristeja maibé hanesan mós loron heroiku no loron historiku tanba iha loron ne'e joven sira fó an ba mate hodi hananu mundu ba Timor nia luta,"dehan PR Lú Olo iha nia intervensaun ba komemorasaun loron Masakre Santa Crus ba dala-29, iha semitériu santa crus ohin.

Nia hatutan, loron ne’e lori memoria atu hanoin fila fali espiritu nasionalismu juventude sira nian. Loron ohin hanesan loron eroiku ne'ebé nakonu ho espiritu nasionalismu no patriotismu tanba ne'e ohin loron ita nia hamrik fila fali iha fatin ida ne'e hodi hanoin ita nia joven sira ne'ebé hatama sira ba sakrifisiu ida ne’e.

"Tanba ne'e husu ba maun alin Timor sira iha ne'ebé de’it atu bele fó minutu ida hamatek ba ita nia foinsae sira ne'ebé sakrifika sira nia an iha 12 Novembru,"tenik nia.

Iha fatin hanesan, Prezidente Komité 12 Novembru Gregorio Saldaña iha nia diskursu husu ba públiku atu bele halo separasaun ba sira nia komprensaun husi akontesimentu Masakre Santa Kruz iha loron 12 fulan-Novembru 1991 katak juventude loriku Asw’ain hanesan autor ba manifestasaun maibé la'ós autór ba masakre.

"Juventude sira halo de'it manifestasaun maibé la halo krime, asaun ne'e pasifika maibé ita nia maluk Indonézia sira mak halo provokasaun hodi hamosu masakre ne’e,"esplika iha santa krus ohin

Komemorasaun masakre Santa Kruz no selebrasaun Loron Nasionál Joventude 12 Novembru 1991 ho remata "Juven, Autór Sosiedade Reziliente" hodi refleta fali espiritu solidariede no nasionalismu juventude loriku aswai’n sira ne'ebé fó an ba mate tan justisa no lialos