“Ba esposa, oan sira no família tomak, ba lideransa, kuadru no militante sira FRETILIN nian, ha'u hato'o ha'u nia kondolénsia kle'an liu ba matebian Prezidente Francisco Guterres Lú Olo nia mate iha ospitál ida iha Malázia,” Xefe Estadu hato’o sentidu kondolénsia liu husi Komunikadu ne’ebé Online INDEPENDENTE asesu, Segunga (22/06).

Xefe Estadu, simu informasaun ne'e ho tristeza makaas no nia konsidera Prezidente Francisco Guterres Lú Olo nia mate hanesan nasaun nia perda boot ida.

“Durante ha'u nia estadia badak iha Malázia iha loron 13 to'o 16 Juñu, ha'u ba ospitál ne'ebé Prezidente Francisco Guterres Lú Olo hela iha sala kuidadu intensivu nian. Ha'u rona nia saúde nia diagnóstiku husi nia médiku timor-oan no ha'u ko'alia ho nia feto Cidália Lopes Nobre Mouzinho Guterres. Ha'u hetan informasaun kona-ba Prezidente Francisco Guterres Lú Olo nia kondisaun kliniku grave. Tan respeitu ba pasiente no família nia privasidade, bainhira fila mai Dili, ha'u dehan de'it ba jornalista sira katak ha'u ba ospitál atu buka hatene Ex Prezidente Repúblika Dr. Francisco Guterres Lú Olo nia saúde nia kondisaun, la esplika kle'an kona-ba nia kondisaun kliniku,” Haktuir Xefe Estadu.

Liuhusi dalan privadu, Xefe Estadu Horta, fahe informasaun kona-ba Prezidente Francisco Guterres Lú Olo nia kondisaun kritiku ba partidu nia lideransa másimu.

Nia konta, Prezidente Francisco Guterres Lú Olo mak patriota boot ida, lider sentrál ida ba luta libertasaun nian, lider ba partidu istóriku FRETILIN, no serbí ona funsaun aas hotu-hotu iha Estadu.

“Ha'u kontaktu Embaixadór Timor-Leste nian iha Malázia atu koordena asaun hotu ne'ebé presiza, hamutuk ho família no Estadu nia estrutura sira ba lori isin mate mai Timor-Leste. Ha'u kontaktu mós AERO DILI atu prepara voo espesiál ida ba lori isin mate no família sira,”Nia informa.

Prezidénsia Repúblika, hamutuk ho órgaun Estadu seluk, sei fó apoiu hotu no onra Estadu tomak ba Prezidente Francisco Guterres Lú Olo.