“Ha’u husu ba komunidade no populasaun sira tomak, ita-nia vasina agora iha, nune’e bele oferese-an ba iha sentru saúde sira ne’ebe besik hodi simu vasina,”dehan nia, bainhira simu vasina AstreZeneca faze dahuluk, ne’ebé akompaña husi Espoza Cidália Nobre Guterres no funsionáriu sira, iha Salaun Serimónia Ofisiál Palásiu Prezidensial Nicolau Lobato, Dili, tersa ohin (25/05).

Xefe Estadu enkoraja, ba komunidade sira atu koopera ho Ministériu Saúde hodi simu vasina, nune’e bele proteje-an no livre husi moras Covid-19.

“Se ita la simu vasina, bainhira mak ita bele livre? ita kontinua nafatin de’it ho situasaun ida hanesan ne’e, ita nunka livre atu bele halo ita-nia servisu”, hatutan Xefe Estadu.

Entretantu, iha lansamentu ba vasina AstreZeneca faze dahuluk iha loron 7 fulan-Abril, Xefe Estadu la simu vasina tanba, fó oportunidade uluk ba servisu frontline sira ho komunidade atu simu vasina.

Nune’e ohin Xefe Estadu iha oportuniadade hetan ona vasina AstreZeneca faze dahulu.

 “Ohin, ha’u mai hamutuk ho funsionáriu sira, atu simu vasina, hanesan parte husi Prezidénsia-da-Republika nian hodi koopera ho Estadu tomak no bele halo mós prevensaun pesoalmente ba ha’u-nia saúde,ba familia ho komunidade nian, purke Prezidente Repúblika kontaktu ho ema barak. Tanba ne’e mak ohin, ha’u mai hamutuk ho imi hotu, ita simu vasina ida ne’e”. tenik nia.

Asistente Editor: Saturnina da Costa