Embaixadór Portugál iha TL, Duarte Búe Alves, hato'o agradesimentu klean tebes ba governu Timor-Leste ne'ebé tulun ona Portugál ba iha prosesu rekonstrusaun hafoin pasajen tempestade kristin.

"Governu Timor-Leste deside fó doasaun millaun $5 ba Portugál hodi tulun iha prosesu rekonstrusaun, tuir tempestade sira ne’ebé grave tebes, tempu aat no eventu meteorolójiku estremu sira ne’ebé afeta iha Portugál, liuliu iha rejiaun sentrál iha sidade Leiria, ne'ebé hetan afetadu maka'as", dehan nia, iha Palásiu Governu, horisehik.

Duarte hatutan, Governu Timor-Leste ho nia povu iha jestu laran-luak boot ida ne’ebé kle’an tebes hodi deside fo doasaun ba Portugál. Nune'e Repúblika Portugál merese atu fó agradesimentu no apresiasaun ba Timor-Leste nia solidaridade ne'ebé ho domin ba nia maluk nasaun maun alin sira.

"Bainhira governu Timor-Leste deside fó doasaun, ha'u kontaktu kedas ba Lisboa hodi komunika desizaun ne’e ba sira, no sira orienta ha'u hodi Governu Portugál nia naran atu hato’o agradesimentu ba governu Timor-Leste no nia povu doben sira hotu ne'ebé sempre iha solidariedade ho sira-nia nasaun maun-alin sira", nia dehan.

Antes ne’e, iha Kuarta (4/2), Konsellu Ministru aprova ona doasaun ida ho dolar amerikanu millaun $5 ba Repúblika Portugeza, hafoin pasajen tempestade (anin boot akompaña ho udan) Kristin nian liuhosi teritóriu portugés, ne'ebé husik hela destruisaun/estragus iha rejiaun balu país nian, liuliu iha zona sentrál.

Fenómenu meteorolójiku estremu sira kauza ona ema mate, ema sira ne'ebé dezlokadu, estragus maka'as ba uma sira, infraestrutura públika no ekipamentu koletivu, nune’e mós interupsaun iha fornesimentu enerjia, transporte no servisu esensiál sira seluk.

Apoiu finanseiru ne’e ho objetivu atu kontribui ba esforsu resposta imediata, rekuperasaun no rekonstrusaun iha área sira ne’ebé afetadu liu.