Enkuantu, iha dialogo ne’e, depuadu husi bankada lima iha Parlamentu Nasional maioria aseita atu halakon lei refere.  

Nune’e, Prezidente Portavós EUTL Cristovão Mauto, husu ba Bankada sira iha Parlamentu Nasional, liliu Bankada governu atu  aseita halakon lei pensaun vitalisia.

“Ohin mós hatete katak, halakon, altera ne’e la’ós responde ba ezizensia povu Timor nian, halakon mak bele responde. Tanba ne’e ohin ami rona hotu idea sira atu halakon, ami apresia,”dehan Prezidente Portavós EUTL, Cristovão Mauto, iha sala konferénsia Parlamentu Nasionál, Kuarta ne’e (17/09/25).

Nia dehan, bainhira ko’alia kona ba akordu, iha prinsipiu ne’ebé importante iha akordu maka nuudar baze legal ida.

“Tenke iha akordu ida ho ami, halakon lei pensaun mensal vitalisia tenke iha akordu ida para ita hotu kumpre ba akordu ne’e. Ita bele ko’alia ho ibun deit mais ita lakohi. Ami nia hakarak mai tur iha ne’e, liu husi parte PNTL fasilita ami mai iha ne’e para ita tur hamutuk ko’alia halakon lei pensaun mensal vitalisia,”tenik Prezidente Portavós.

Nia afirma liu tan, bainhira iha ona akordu ne’e, fahe mós ba portavós sira, no mós kada bankada atu bele haree hodi la'o tuir.

Entretantu, ezizensia ne’ebé EUTL ezize ba PN maka halakon lei pensaun mensal vitalisia, altera lei manifestasaun nian, redus osan viajen ba estranjeiru hodi aloka ba iha setór produtivu sira.

Enkuantu, ezizensia seluk maka kona ba hapara sosa tan kareta foun ba deputadu sira, maibé ezizensia ida ne’e deputadu sira responde ona no aprova ona rezolusaun ida ba iha kanselamentu akizasaun viaturas ba deputadu sira iha Parlamentu Nasional.