“Atividade polisiál ida ne’e hanesan asaun konkreta ida oinsa atu bele inspira no motiva ita nian komunidade ka grupu individuál no grupu kriatividade ne’ebé bele mai hamutuk oinsa ita hamutuk bele prevene Covid-19 iha sidade Dili”, dehan nia, iha Kolmera, horisehik.

Nia dehan, atividade ne’e mós nu’udar konsensializa regra Estadu Emerjénsia ba komunidade, nune’e bele koopera ho polisia hodi bele prevene virus ne’e, hodi proteje-aan, proteje família, no ambiente hodi bele hadook-aan husi Covid-19.

Maski transporte públiku balun kontinua la obedese ba regra estadu emerjénsia, tanba ne’e komandu jeral sei realiza fali enkontru ho komandante munísipiu hodi halo evaluasaun no simu orientasaun foun balun hodi implementa medida dekretu governu númeru 3/2020 ho di’ak.

“Ida ne’e di’ak ba ita hotu nian vida tomak, la’ós de’it ba polisia, maibé sidadaun iha Dili laran tomak, no ita nian nasaun Timor-Leste tenke servisu hamutuk hodi kombate lesuk surtu Covid-19,” tenik Armando.

Aliende ne’e, kona-ba loja sira kontinua loke, tanba dekretu estadu emerjénsia la bandu, maibé tenke kumpre orientasaun ne’ebé fó sai husi Organizasaun Mundiál Saúde (OMS) no mós Ministériu Saúde nian ne’ebé nasaun hotu-hotu adopta.

“Importante mak mantein nafatin distansia sosiál, kria fasilidade hodi fase liman, uza protesaun isin, hanesan maskra no mós dezinfektan,” nia sujere.

Tuir observasaun Jornalista INDEPENDENTE, komunidade sira ne’ebé halo movimentu ho transporta privadu sira koopera ho parte polisia hodi rega dezinfektan.