“Ekipa integradu husi Unidade Polísia Marítima no intelejensia sira deteta katak, iha movimentu informasaun ne’ebé ita rekolla husi parte rai-klaran, iha movimentu ne’ebé mak ita suspeitu katak, sira envolve iha krime organizadu ho importasaun ilegal ba sasán merkadoria ne’ebe ita bandu,” dehan portavos PNTL, Superintendente Joao Belo dos Reis, iha Komandu Jerál PNTL, Sesta (27/2).

Nia haktuir, autoridade seguransa hapara sidadaun Timoroan ida ho naran inisial FTFM kondus karreta iha parte Kasnafar mota ulun nian, karreta mini bus marka nissan ida ho numeru matrikula C.10.579 TL detekta tula sigaru  ilisitu Marlboro ne’ebe kontra bandu.

“Ita konsege detekta iha Mini Bus laran sasán ilegal sigaru Marlboro kaixa-50, ne’ebe deskonfia hatama iha tasi mane nian, agora dadaun suspeitu ne’ebe tula sasan ne’e mai no mos karreta ne’ebé tula sasán ne’e agora daudaun para iha parte Investigasaun Kriminál hodi submete ba prosesu investigasaun, nune’e hodi submete ba iha Ministeriu Publiku”, nia informa.

Nia dehan, ida tula sasan sigaru ilegal ne’e hanesan kondutor de’it na’in loloos ne’e sei iha prosesu investigasaun mai, parte autoridade sei buka tuir.

Nia hateten, servisu intelijensia no servisu integradu sira seluk sei buka tuir nafatin tanba sigaru ilegal sira modelu transportasaun ne’e la’ós primeiraves tama Díli.

“Entaun ita sei buka tuir sigaru sira ne’e nia paradeiru iha ne’ebé se mak uja no se mak rai ita sei buka tuir”, nia hatutan.

Nia dehan, sigaru Marboro importasaun legal ne’ebe mak kompania na’in ba sigaru ne’e regista iha governu ne’e legalmente, maibé iha fali produsaun seluk ne’ebe la legál tenta hatama produtu sira ne’e liu husi dalan ilegal mai Timor-Leste.

“Maluk sira hatene, sigaru sira hatama husi dalan legal ita-nia Governu prega taxa bo’ot, tanba iha rendimentu taxa maka’as, nune’e ita tenki halo servisu maka’as hodi ema hotu-hotu kumpri ba lei no ema hotu-hotu selu taxa”, nia dehan.

Nia haktuir, ekipa forsa konjunta dadaun halo servisu iha tereinu kontinua buka evidensia sigaru sira ne’ebé laos Marlboro original, tanba iha informasaun sasan sira ne’e tama mai territoriu Timor-Leste dala barak ona.