Iha Sesta (10/04) no Sabadu (11/04), autoridade lokal iha Suku Fatuhada no Komoro, hahú halibur komunidade sira iha Sede Suku hodi trata dokumentus uma-kain atu bele hetan subsidiu husi governu.

Komandante PNTL Dili, Superintendente Xefe Armando Monteiro hatete, polisia seidauk simu orientasaun husi Sentru Integradu Jestaun Krize (SIJK) no autoridade munisipiu Dili hodi autoriza xefe suku halibur komunidade iha sede suku.

Tanba ne’e, nia dehan, komandu PNTL sei la autoriza komunuidade sira atu halibur hamutuk iha sede suku durante estadu emerjensia.

“Atividade ne’e inisiativa rasik husi xefe suku iha suku rua Komoro ho Fatuhada, tanba ne’e ha'u fó ona orientasaun ba Ofisial Polísia Suku bele hapara tiha atividade ne’e no hein orientasaun husi governu mak bele koleta fixa familia,” dehan Armando liu husi komferensia imprensa iha Komando Munisipiu Dili, Kaikoli, Sabadu (11/04).

Komandante ne'e husu ba autoridade lokal sira atu respeita regras ne'ebé governu hasai ba prevensaun Covid-19.