Vise-Prezidente Parlamentu, Maria Angelina Sarmento, anúnsia rezultadu votasaun rezolusaun Parlamentu Nasionál ba deslokasaun Prezidente Repúblika ba Singapura ho votus a-favór 56, laiha abstensaun no kontra.

"Nune'e rezolusaun Parlamentu Nasionál nian sobre deslokasaun Prezidente Repúblika ba Repúblika Singapura aprovadu," dehan nia, iha Parlamentu Nasionál, horisehik.

Ho autorizasaun Parlamentu Nasionál nian maka Prezidente Repúblika, José Ramos-Horta, sei halo deslokasaun ba Repúblika Singapura hahú 6 to'o 11 Dezembru 2022.

Pedidu Prezidente Repúblika husu konsentimentu ba Parlamentu Nasionál bazeia  númeru 1 artigu 80, no alínea h) númeru 3 artigu 95 Konstituisaun Repúblika Demokrátika Timor-Leste (K-RDTL).

Hodi husu Parlamentu Nasionál nia autorizasaun ba vizita Estadu ba Repúblika Singapura.