Primeiru-Ministru kongratula bainhira partisipa selebrasaun loron Idul Fitri 1447H hamutuk ho komunidade Muzulmana sira iha Embaixada Repúblika Indonézia Faról, Dili, sesta (20/03/2026).
“Ha’u hodi Governu no povu tomak nia naran, harohan bá Maromak atu tulun nafatin maluk sira ne’ebé ohin selebra loron Idul Fitri. Ita hotu husu nafatin bá leten-as bá hodi tulun nafatin ita. Haku’ak malu ho domin, nune’e dame bele hamriik iha Timor nu’udár kondisaun bo’ot di’ak tebes atu ita bele dezenvolve ita-nia rain,” PM Xanana kongratula liu husi komunikadu ne’ebé Media INDEPENDENTE asesu husi Media G-PM, Sexta (20/03).
Prezensa Primeiru-Ministru nian iha selebrasaun loron bo’ot ne’e, tanba hetan kovite hosi Embaixadór Repúblika Indonézia iha Timor-Leste, Okto Dorinus Manik ne’ebé iha tempu badak sei husik hela Timor tanba misaun hotu ona.
Tanba ne’e maka Xefe Governu aproveita mós hodi agradese bá Embaixadór ne’ebé durante mandatu ho esforsu bo’ot hodi hametin nafatin relasaun diplomátika nasaun rua nian.
“Ne’e duni bá maluk Musulmana sira tomak iha Timor, ha’u-nia haku’ak bo’ot no respeitu bo’ot, ita hotu hamutuk hanoin ida de’it kria domin no dame hodi ita bele lori rai ida-ne’e bá dalan loos,” Xanana Gusmão husik hela mensajen.
Prezensa Kay Rala Xanana Gusmão iha selebrasaun Idul Fitri iha Embaixada Indonézia iha Dili la’ós de’it serimoniál, maibé iha sentidu diplomátiku no sosiál liu-liu hatudu relasaun di’ak entre Timor-Leste ho Indonézia iha nível Governu no povu rua.
Liu-tán ida-ne’e, prezensa Xefe Governu hatudu respeitu bá komunidade Musulmana no apoiu bá diversidade relijioza, kria ambiente unidade, toleránsia no kooperasaun entre kultura no relijiaun sira iha nasaun no komunidade Indonézia iha TL tanba Idul Fitri mak loron bo’ot bá Musulmanu sira.
Iha fatin hanesan Embaixadór Indonézia iha Timor-Leste, Okto Dorinus Manik kontente no konsidera loron ksolok ida-ne'e nu’udár loron vitória bá Muzulmanu sira iha mundu liu-liu iha Timor-Leste.
Momentu ne’e espesiál tebes, tanba iha semana hirak liu-bá selebra ona loron Nyepi, tuir kedan ho Tinan Foun Xinés no daudaun ne’e sarani Katólika iha hela períudu jejún. Nune’e, semana sira ne’e nu’udár loron Santu bá Ema fiar na’in-sira.
“Hodi ha'u-nia naran, ha'u-nia família no Embaixada Repúblika Indonézia nian dezeja Feliz Idul Fitri 1447. Ami hato’o deskulpa sinseru bá sidadaun Indonézia tomak no mós bá sidadaun Musulmanu Timor-Leste iha Dili,” Embaixadór felisita.
Muzulmanu mak ema sira ne'ebé tuir relijiaun Izlaun nian, fiar monoteísta ida ne'ebé bazeia bá Alkuraun no hanorin sira hosi Muhammad, ho maizumenus seguidór biliaun 2 iha mundu tomak.
Muzulmanu sira tuir Pilár lima mak hanesan, Deklarasaun Fiar nian, Orasaun loroloron nian, Zakat ka karidade, Jejún durante Ramadan no Peregrinasaun bá Meka.
Prezensa Primeiru-Ministru iha selebrasaun ne’e akompaña hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay ho membru Governu balun.