Konfiansa ne’e hato’o durante enkontru entre Xefe Governu ho Komandante Jerál PNTL, Komisáriu AsisténteAfonso dos Santos, ne’ebé akompaña husi Komandante-Jerál daruak, Natércia Eufrásia Soares Martins, iha Palásiu Governu, Sesta (10/04).
Komandante Jerál PNTL, Afonso dos Santos hatete, enkontru ne’e simples de’it, maibé importante hodi halo koordenasaun servisu ho lideransa governu.
"Ha'u la ko'alia barak tanba ami hasoru Primeiru Ministru atu ko'alia ho ami rua kona-ba servisu," dehan Afonso ba Jornalista sira.
Iha fatin hanesan, Komandante-Jerál daruak, Komisária Asisténte Natércia Martins esplika, enkontru ho PM Xanana mós atu komprimenta ba Páskua no reafirma komitmentu PNTL atu kumpre mandatu ne’ebé governu fó.
"Ami halo ami-nia efetivu servisu durante semana rua ona, no ami hasoru Primeiru-Ministru atu komprimenta feliz Páskua nian no hato'o ami-nia komitmentu katak Primieru Ministru nia konfiansa ne'ebé deposita mai ami, ami sei responsabiliza iha ami-nia misaun tuir mandatu ne'ebé ami simu,” dehan Natercia.
Natércia akresenta katak orientasaun husi Xefe Governu klaru tebes, katak PNTL tenke servisu ho profisionalizmu atu garante seguransa ba povu iha teritóriu tomak, hahú husi kapitál to’o área rural sira.
"Mensajen no orientasaun ne'ebé Primieru Ministru fó asegura situasaun iha teritóriu Timor laran tomak atu nune'e garante estabilidade, pás no hakmatek ba ema hotu-hotu,” katak nia.
Iha oportunidade ne’e, PM Xanana husu lideransa PNTL atu kontinua servisu ho di’ak no halo avaliasaun kona-ba nesesidade instituisaun nian, atu governu bele fó apoiu bainhira presiza.
“Fó tiha pose iha semana kotuk, sira bá hala’o servisu no agora mak ami hasoru-malu hodi fó konfiansa atu servisu ho di’ak. Fó hanoin bá malu atu haree took saida mak Polísia presiza tanba ha’u hanesan Primeiru-Ministru bainhira iha buat ruma karik sei aviza bá sira na’in rua atu kumpre devér no servisu ho di’ak,” dehan PM Xanana.
Xefe Governu mós fó atensaun katak iha tinan 2027 no 2028, Timor-Leste sei hasoru presaun no eventu importante sira, nune’e presiza preparasaun di’ak husi forsa seguransa.
Entretantu, PM fó posse ba Afonso nu’udar Komandante Jerál PNTL no Natércia nu’udar Komandante Jerál daruak ba períodu tinan tolu (2026–2029), iha Palásiu Governu, 27 Marsu 2026 liu ba.