Xefe Governu hatete, bainhira poder lokal implementa ona, munisípiu mak sei responsabiliza ba jestaun orsamentu no dezenvolvimentu.

Tanba ne’e, Xanana husu atu servisdor sira la’o ba Postu Administrativu hotu-hotu hodi koñese kle’an liu potensiál no nesesidade komunidade nian.

"Tanba Estadu kria kondisoens, maibé see mak atu dezenvolve setór privadu?. Agora atu asembleia munisipal, imi idaidak tuur iha fatin hodi halo servisu ba rai ida ne'e no povu ida ne'e,” dehan PM Xanana, liu husi nia diskursu, iha salaun Parokial Gleno, Ermera, Kuarta (25/02).

Primeiru Ministru hatutan, bainhira autonomia lokal hahú, lideransa munisípiu mak sei diskute no aprova orsamentu rasik.

"Imi mak sei halo imi-nia orsamentu, imi mak sei kaer finansas, tanba ida ne’e ema ida de’it sei la to'o, tenke forma rekursu umanu, hadia nafatin,” dehan nia.

Daudaun ne’e, Governu sentral halo vizita no avaliasaun ba munisípiu sira iha teritoriu tomak hodi prepara implementasaun poder lokal, ho objetivu atu dada governu besik liu ba povu.

Iha okaziaun hanesan, Ministru Administrasaun Estatál (MAE), Tomás do Rosário Cabral, esplika katak avaliasaun ba kondisaun mínima administrativu hetan rekomendasaun husi Cámara de Contas, inklui kona-ba jestaun portal munisípal.

Tinan kotuk, husi relatóriu Cámara de Contas ba munisípiu sira, iha munisípiu ida de’it mak seidauk hatama relatóriu no hetan notifikasaun dala rua.

Enkuantu, Prezidente Autoridade Munisípiu Ermera, José Martinho dos Santos Soares, afirma katak Ermera iha ona kondisaun favorável atu simu poder lokal.

Tuir nia, munisípiu ne’e iha rekursu umanu sufisiente no esperiénsia iha ezekusaun programa sira hanesan projetu Estrada Rurais, PDM, PNDS no jestaun merkadu.

“Ami iha kondisaun favorável atu simu poder lokal. Buat balun presiza hadia, maibé kompeténsia munisípal nian ami ezekuta hotu ona ho kapasidade di’ak,” dehan José.

Nia mós konsidera prezensa PM Xanana iha Ermera hanesan sinal katak munisípiu ne’e teknikamente no politikamente prontu ba etapa foun ida ne’e.

Atividade aprezentasaun avaliasaun kondisaun mínima ne’e partisipa husi funsionáriu públiku, membru PNTL no F-FDTL, veteranus, lider relijiozu, autoridade lokal, deputadu sira husi Ermera, ferik-katuas, joven no estudante sira.

Munisípiu Ermera iha Postu Administrativu 6, suku 56 no aldeia 276, ho total uma-kain 41.707 no populasaun hamutuk ema 177.333, kompostu husi mane 87.715 no feto 89.618.

Ho númeru ne’e, implementasaun poder lokal iha 2027 konsidera hanesan pasu importante atu asegura dezenvolvimentu ne’ebé inkluzivu no sustentável ba povu Ermera.