Husi total orsamentu rihun $10 ne’e, rihun $5 fó ba Kapela Huebanais iha Aldeia Sabem, Suku Bobometu, Postu Administrativu Oesilo, no rihun $5 ba Kapela São Carlos Borromeu iha Aldeia Bihala, Suku Bobokase, Postu Administrativu Pante Makasar.

Samuel, esplika katak ajuda ne’e reprezenta apoiu pesoál husi Primeiru Ministru atu ajuda sarani sira finaliza konstrusaun ba kapela ne’e.

"Antes ha'u mai Oekusse Primeiru Ministru bolu ha'u ba uma dehan katak imi-nia Igreja iha hela prosesu konstrusaun. Entaun Primeiru Ministru hakarak ajuda uitoan ba imi-nia kapela.Tanba imi dook husi igreija entaun tenke konstrui kapela ne'e atu imi bele tuir misa," dehan Samuel hafoin entrega apoiu refere, Tersa (24/02).

Ministru Samuel husu responsabel sira atu bainhira konstrusaun remata bele hato'o fali relatoriu ba Primeiru Ministru.

"Karik buat balun seidauk remata depois imi hato'o karta ba PM," katak nia.

Iha fatin hanesan Aldeia Sabem, Abilio Ilin, agradese ba PM Xanana ne’ebé fó ajuda hodi kontinua prosesu konstrusaun kapela.

"Ami hanesan sarani kontribui osan uitoan hodi konstrui kapela ne'e. Maibé ami nia kbi'it la to'o, nune'e ami husu ba Primeiru Ministru, Kay Rala Xanana Gusmão hodi ajuda ami nia kapela ida ne'e," katak nia.

Objetivu harii kapela ne'e tanba komunidade iha area ne’e atu asesu ba Parokia Oekusse ho distansia dook.

Entretantu, Xefe Suku Bobokase, Tomas Nesi hatete, kapela São Carlos Borromeu harii iha tinan 2010.

"Ami tau osan hamutuk hanesan sarani $50 dollar no funsionariu ami haree tuir salariu, ezemplu salariu $200 dollar, entaun hatama $100 dollar," dehan nia.

Autoridade lokal ne'e, agradese ba PM Xanana tanba bele aprova sira-nia proposta hodi ajudu orsamentu.