Mensajen ida ne’e hato’o hafoin enkontru semanál ho Prezidente Repúblika, José Ramos Horta, iha Palásiu Prezidensiál Bairu-Pite, Kinta (02/04).

PM Xanana hatete, Páskua mak tempu importante atu lembra sakrifísiu Jesus Kristu ne’ebé terus, ema kaer, dadur no ikus mai mate iha kruz.

Tanba ne’e, nia husu joven sira atu uza momentu ida ne’e hodi kontrola an no hadia relasaun sosial.

“Páskua fó lembra ba ita kona-ba Jesus nia terus. Tanba ne’e, ha’u husu liu-liu ba joven sira atu haka’as aan hodi redus uitoan tensaun iha família rasik no iha komunidade,” dehan PM Xanana.

Nia hatete, governu kontinua simu relatóriu kada semana rua husi Ministériu Interiór no PNTL kona-ba kazu kriminal hanesan asaltu, baku malu no na’ok. Maski la’ós konsidera aat liu, maibé kazu sira ne’e nafatin akontese iha sosiedade.

Tanba ne’e, governu husu entidade lokal sira, hanesan autoridade munisípiu, postu administrativu no lideransa suku, atu halo prevensaun liu husi diálogu ho joven sira iha kada área.

PM Xanana subliña katak Timor-Leste hanesan rai ida ne’ebé relativu dame, maibé edukasaun no orientasaun ba joven sira sei importante atu asegura sira bele komporta ho di’ak iha sosiedade.

“Ita baku malu. Joven sira mak presiza hanorin didi’ak oinsa bele komporta ho di’ak ba sira nia aan, ba família, no ba komunidade,” nia dehan.

Ikus liu, Xanana hato’o feliz Páskua ba povu tomak, ho enfaze katak periódu ida ne’e la’ós de’it tempu festa, maibé mós tempu reza no halo reflesaun atu hadia moris.

“Páskua tenke sai momentu reflesaun ida ba ita hotu hodi hadia aan. Feliz Páskua ba povu tomak, liu-liu ba joven sira,” konklui PM Xanana.

Molok ne’e, PR Horta, hato’o mós mensajen Paskua ba Timor-oan tomak ne’ebé selebra.

Horta apela ba sarani sira atu hametin dame iha rai laran durante selebrasaun Páskua.

“Ita hotu-hotu iha loron Páskua tenke hametin liu tan dame iha rai laran. Timor di’ak hela no ita presiza kontinua halo esforsu atu mantein dame,” dehan PR Horta, iha salaun Palásiu Prezidensiál Bairu-Pite, Tersa (31/03).