Print this page
PM Taur Matan Ruak PM Taur Matan Ruak

PM Taur: Ekipa Médiku Kontinua Serbisu, Lalika Ta’uk ba Presaun Featured

DILI:Primeiru-Ministru, Taur Matan Ruak, enkoraja ekipa mediku sira atu kontinua hala’o serbisu no lalika tauk ba presaun sira.

Xefe Governu ne’e kontinua enkoraja mediku sira, relasiona ho pasiente na’in ida ne’ebé positivu Covid-19 hakotu iis hodi kalan, nune’e ohin dader, eis Prezidente Repúblika, hanesan mós eis Primeiru-Ministru, Xanana Gusmão ba hala’o impedementu, hodi Governu labele lori ba haloot tuir protokolu saúde nian iha semitériu própriu Covid-19 nian iha Metinaru.

Ho situasaun ida ne’e, daudaun ne’e hamosu ema nia sentimentu negativu ba profisionál saúde sira, ema balun hahú reazen tuda ambulánsia sira no la fiar médiku sira.

Ba situasaun ida ne’e, Xefe Governu enkoraja médiku sira no ekipa liña frente hotu atu kontinua firme serbisu, keta triste no lakon esperansa, tanba Governu no Estadu iha hela ita-boot sira nia sorin.

“Ha’u lamenta ho situasaun ohin iha Vera Cruz, devia ser ida ne’e la podia akontese.  Ha’u rona, ema balun komesa tuda ambulánsia no ita nia ekipa liña frente sira, atitude ne’e sei la ajuda atu kombate moras ne’e iha ita- nia rain," dehan Primeiru Ministru Taur Matan Ruak husi komunikadu imprensa ne'ebé online Independente asesu husi media Gabinete, Segunda ohin (12/04).

“Hanesan Primeiru-Ministru, hakarak manifesta ha’u-nia solidariedade no apoiu tomak ba profisionál saúde no ekipa sira hotu iha liña frente iha Sala Situasaun, korajen no kontinua serbisu, ita-boot sira sei la mesak, Governu no Estadu tomak iha ita-boot sira nia kotuk.”

 

Jornalista: Pedro Alves

Editor: Jose Sarito Amaral

Read 682 times
Rate this item
(0 votes)