Print this page
Ministru Administrasaun Estatal, Miguel Perreira de Carvalho. Ministru Administrasaun Estatal, Miguel Perreira de Carvalho.

PM Orienta MAE Halibur Dadus Populasaun Afetadu Inundasaun Featured

DILI:Primeiru-Ministru (PM) Taur Matan Ruak, fó orientasaun ba  Ministériu Administrasaun Estatal (MAE) atu fó instrusaun ba autoridade lokal no líder komunitáriu sira atu halibur dadus populasaun ne’ebé nia sasán hetan estragus husi inundasaun ne’ebe akontese iha loron 4 fulan-abril 2021.

Hafoin simu orientasaun, Ministru Administrasaun Estatal, Miguel Perreira de Carvalho, orienta kedas administradór postu ho xefe suku sira hodi halo levantamentu ba dadus populasaun sira ne’ebé hetan sasan estragus husi inundasaun atu aprezenta ba governu.

“Primeiru-Ministru orienta ona ha’u iha semana kotuk, nune’e ha’u mós orienta tutan ona ba iha autoridade komunitáriu sira, atu halo levantamentu dadus ba estragus sira ne’ebé akontese iha ita-nia sidadaun sira,”Ministru Miguel informa ba jornalista, Sábdu (10/04), hafoin halo sorumutuk iha Ministériu Finansas, Aitarak-Laran, Dili.

Tuir planu, dadus sira-ne’e, autoridade lokal no líder komunitáriu sira sei aprezenta ba governu iha segunda-feira semana oin.

“Dadus ne’ebé mak ita-nia liurai sira sei aprezenta fali mai iha autoridade munisipal Dili segunda semana oin, para semana oin ne’e ita-bele iha ona dadus konsolidadu ida kona-ba estragus ne’ebé akontese iha dia 4 de abríl,” nia dehan tan.

Aliende ne’e, nia haktuir MAE mós distribui ona formuláriu ho formatu tolu ba xefe suku sira, atu rejista no halo dimensaun ba populasaun sira-nia bens ne’ebé hetan estragus husi dezastrea naturál foin lalais ne’e.

Nia esplika, iha formatu tolu primeiru atu identifika populasaun sira-ne’ebé nia sasán hetan estragus, formatu segundu identifika infraestrutura públiku sira-ne’ebé kada suku estragus no terseiru formatu kons ba seitór privadu sira-nia ekipamentu sira.

Tuir dadus ne’ebé MAE simu husi Sekretáriu Estadu Protesaun Sivil, iha populasaun rihun 15 mak desloka hodi refujia ba fatin hotu-hotu, no ema ne’ebé lakon hamutuk na’in 42, enkauntu na’in 4 seidauk hetan.

Molok ne’e, sesta horsehik (9/4) Parlamentu Nasionál halo ona audensia ho Governu liuhusi ministeriu sira hodi deskuti kona-ba orsamentu retifikativu ho montante dollar amerika millaun $233.8.

Orsamentu ne’e sei utiliza ba rekuperasaun ekonomika relasiona ho pandemia Covid-19 no apoiu rejolve problema inundasaun.

 

Jornalista: Saturnina da Costa

Editor: Jose Sarito Amaral

Read 533 times
Rate this item
(0 votes)