“Ha’u triste tebes ho notísia kona-ba matebian antigu Prezidente Timor-Leste, Francisco Guterres. Iha naran Malázia, hau hato’o kondolénsia kle’an ba nia família no ba povu Timor-Leste tomak,” Dehan Primeiru Ministru Malásia Anwar Ibrahim liu husi komunikadu, iha nia Pájina Ofisiál,  Segunda (22/06).

Nia haktuir, Eis Prezidente Republika Guterres mak parte husi jerasaun ne’ebé luta iha ai-laran no konsege hetan Timor-Leste nia independénsia.

“Nia pasa tinan barak iha rezisténsia ne’ebé halo nia koñesidu ho naran Lú-Olo, no depois servi nia rain hanesan Prezidente Parlamentu Nasionál no Xefe Estadu. Iha nia vida tomak, nia nafatin dedika-an ba liberdade povu nian no konstrusaun nasaun demokrátika ida,” Nia hato’o.

Novidade triste ne’e, povu Malázia sente no hola parte iha lutu hamutuk ho povu Timorense, tanba nia partida. Nia sei nafatin lembra iha Malázia ho respeitu no karíñu boot.

Nia infroma, oras ne'e Kadaver Francisco Guterres “Lú Olo” sei iha Mortuáriu Ospitál Prince Court, iha Kuala Lumpur, Malázia no iha ona komunikasaun entre familia ho governu hodi translada ba Timor-Leste ho Aero Dili.

‎Saudozu Franciaco Guterres “Lú Olo” ninia partida ne'e reprezenta lakon boot ida ba família boot, ba partidu FRETILIN, ba ninia kompañeiru luta sira, no ba sira hotu ne'ebé partilha hamutuk mehi no harii Timor-Leste ida ne'ebé livre, demokrátiku no soberanu.

‎Familia husu povu Timor-Leste atu hamutuk iha orasaun no fó omenajen ba ninia memória, legadu, no dedikasaun tomak nia fo ba povu timorense.