Eis Prezidente Konsellu Imprensa ne'e mos kestiona ho hahalok sira akontese ohin loron, ne'ebé asesor media SEKomS no Ministeriu Interior ‘hadau’ servisu jornalista sira-nian hodi husu pergunta ba fonte relevante sira.

Nune'e, husu ba Sekretariu Estadu Komunikasaun Sosial (SEKomS) no Konsellu Imprensa (KI) inklui asosiasaun jornalista sira labele nonok hodi akompana fali situasuan hirak ne'e.

"Ha'u akompana diskusaun no debate sira ne'e iha dala-barak mos ha'u haree iha intervensaun. Husu ba politiku no autoridade no ofisial publiku sira evita halo intervensaun ba servisu jornalismu nian", dehan-nia, iha edifisiu CNC, Balide, Sesta (1/8).

Nia hatutan, uluk nia husu ona ba SEKomS atu bele halao servisu hodi fasilita asesu ba jornalista sira hodi bele asesu ba entidade publiku liu-liu ministeriu sira seluk.

"Ha'u nia hanoin SEKomS ninia servisu ida ne'e make tenke halo, la'os atu limita jornalista sira atu husu pergunta ka ou halo intervensaun sira seluk ne'e ke la tuir lei komunikasaun sosial ninian," tenik Virgilio.

Nia konsidera, tanba liberdade imprensa no espresaun halo parte ba direitu umanu, nune'e bainhira iha serimónia ka konferensia iImprensa labele limita jornalista sira, se limita mak viola direitu publiku atu asesu ba informasaun sira.

"Jornalista niae servisu atu prense direitu publiku hetan informasaun, entaun direitu ne'e priense bainhira sira hetan asesu ba fontes informasaun nomos sira dok hosi presaun katak, sira la hetan presaun ou la hetan ameasa ruma hosi parte seluk hala'o sira-nia servisu",nia esplika.

Tuir nia, servisu jornalista mos la perfeitu, la'ós los hela de'it, maibe tenke apoiu atu sai perfeitu, importante minimu ba sira atu hala'o servisu.

Nune'e, nia mos husu nafatin ba Konsellu Imprensa nomos asosiasaun jornalista sira atu bele halo mos advokasia ka konsultasaun ho entidade publiku sira no ministeriu sira atu, nune'e labele limite servisu Jornalista sira-nian.

"Ha'u kontinua husu ba Konsellu Imprensa nomos asosiasaun jornalista sira atu foti mos posizaun ruma atu nune'e bele evita halo intervensaun ba servisu jornalismu nian", nia konklui.

Enkuantu, aktu intervensaun ba jornalista hosi Asesór média Sekretária Estadu Komunikasaun Sosiál (SEKomS) Augusto dos Reis ‘hadau’ knaar jornalista sira-nian hodi husu pergunta bá nia superiór rasik SEKomS, Expedito Dias Ximenes, iha konferénsia imprensa iha ámbitu jogu desportivu CPLP.

Nune'e mos, iha 31 Jullu 2025, atitude dezobediénsia ba Lei Komunikasaun Sosiál artigu 17 hatudu dala ida tan, husi Asesór Média husi Ministériu Interiór nian, Adérito Santa, hanesan mós ho saida mak asesór média SEKomS halo antes ne’e.