Pasiente Covid-19 Na’in 18: Na’in 6 Rekopera, 406 hein Rejultadu Teste Featured

By Gloria Maia Janeiru 04, 2021 753
Koordenadora Jerál Covid-19, Odete Vegas Koordenadora Jerál Covid-19, Odete Vegas

DILI:Pasiente moras Covid-19 ne’ebé sae ba na’in 18, na’in neen (6) rekopera ona, no na’in 12 sei sala izolamentu, inklui na’in tolu (3) iha Oekusi.

Koordenadora Jerál Covid -19, Odete Vegas informa Ministériu Saúde kontinua alerta ba públiku, presiza kuidadu saúde hodi halo tuir regra estadu emerjénsia nian tanba kada loron kazu pozitivu kontinua aumenta.

“Dadus kumulativu teste hamutuk 16.885, sira ne’ebé sei hein rezultadu hamutuk 406, kazu pozitivu 49, totál rekuperadu 37, kazu foun 3, pasiente ne’ebé sei baixa hamutuk 12, rezultadu negativu hamutuk 16.430 no ema ne’ebé sei iha kuarentena hamutuk 313 no totál abitante ne’ebé pasa ona husi periodu kuarentena hamutuk 6.974,”Odete relata liuhusi konferénsia imprensa, iha salaun Ministériu Saúde (MS), Kaikoli, Segunda ohin lorokraik.

Nia subliña, pasiente foun tolu ne’e hotu mane ne’ebé ida ho idade 19, 29 no 43, mai hamutuk husi UK.

Pasiente ida ho idade 19 ne’e viajem husi UK mai Timor-Leste iha loron 21 Dezembru no to’o iha Dili iha loron 22 Dezembru hamutuk ho pasajeiru 100 no sira na’in 14 mak halo kuarentena iha Ótel Vila-Verde hafoin hetan katak sidadaun ne’e pozitivu ba COVID-19.

Pasiente rua seluk viajen husi UK mai TL iha 20 Dezembru to’o iha Dili loron 22 Dezembru hafoin ba kuarentena iha Ótel Time square Fatuhada.

Diretora Odete ne’e mós husu ba públiku atu koopera, kolabora no nafatin tau fiar mai Ministériu Saúde hodi bele hala’o ninia kna’ar tuir padraun, labele pániku, kumpri nafatin regras estadu emerjensia ne’ebé governu dekreta ona no medida preventiva tuir protokolu MS no Organizasaun Mundiál Saúde (OMS) fó sai ona.

Rate this item
(0 votes)

Independente Digital TV