Print this page

Pagamentu Subsídiu Propinas iha UNPAZ atinje 88%

By Julia da Costa Setembru 17, 2021 560
Ema kaer hela osan. Foto:Dok. Ema kaer hela osan. Foto:Dok.

DILI: Pagamentu subsídiu propinas iha Universidade da Paz (UNPAZ) to’o agora atinje ona 88%.

Estudante UNPAZ ne’ebé asesu ba subsídiu propinas iha 9.176 ho montante osan ne’ebé mak Governu transfere iha konta bankária universidade-nian hamutuk millaun $1-resin no daudaun ne’e UNPAZ  atinje ona pagamentu ba estudante-sira hamutuk 88%.

“Ami-nia relatóriu agora atinje ona 88% no iha fim setembru ami bele atinje 100% atu bele aprezenta relatóriu final,” Reitór UNPAZ), Adolmando Soares Amaral, hateten ba jornalista iah Kampus UNPAZ, Kinta (16/09).

Relatóriu preliminár ne’ebé parte eskola haruka ona ba Ministériu Ensinu Superiór Siénsia no Kultura (MESSK) hamutuk 50% no  agora iha 88% no fiar katak iha fulan ida-ne’e nia laran bele hetan ona 100% ba númeru 9.176.

Estudantes husi UNPAZ  hamutuk rihun 9-resin, barak mak halo konfirmasaun hodi hetan sira-nia direitu, maibé balun mak seida’uk tanba sei iha hela foho.

Maibé, MESSK fó hela loron terminasaun hodi hato’o relatóriu finál iha fulan Outubru, tanba ne’e UNPAZ esforsu hodi bele atinji to’o 100%.

Iha sorin seluk, Prezidente Institutu Politékniku Betanu (IPB), Acácio, hateten pagamentu subsídiu propinas IPB nian besik atu remata ona, tanba sei hein hela estudante-sira ne’ebé sei iha foho.

“Besik hotu ona. Estudante balun seidauk mai foti to’o agora. Ami estende tan to'o aban, karik la mai osan restu ami bele entrega fali ba Ministériu Ensinu Superiór Siénsia no Kultura,” nia hateten.

 

Rate this item
(0 votes)