Verba ne'e aloka ba saláriu no vensimentu US$ 1.192.138, bens no serbisu US$ 775.876, transferénsia públika US$ 2.951.440, no kapitál dezenvolvimentu US$ 675.000.

Sekretáriu Estadu Komunikasaun Sosiál SEKomS, Expedito Dias Ximenes hatete, SEKomS, orsamentu ne'e sei aloka ba iha programa funsionamentu no dezenvolvimentu instituisionál ho sub-programa ida no atividade hitu.

"Programa dezenvolvimentu setór komunikasaun sosiál ho sub-programa haat; dezenvolve mekanizmu lejizlasaun, regulamentasaun no regulasaun, diversifika no fortalese meiu komunikasaun, kapasitasaun jornalista no fortalesimentu koezaun sosiál, superintendénsia no tutela órgaun komunikasaun sosiál Estadu ho ninia atividade 13," dehan nia, iha PN, Sesta (14/11).

Nia hatutan, programa dezenvolve sistema komunikasaun institusionál ho sub-programa rua; diseminasaun informasaun ba públiku, dezenvolvimentu sistema komunikasaun interna Governu ho atividade neen.

Entretantu liuhusi diskusaun espesialidade, deputadu CNRT no PD aprezenta proposta ida hodi hasai US$ 382.500 iha dotasaun jerál estadu iha programa inkluzaun sosiál no realoka ba SEKomS nia programa dezenvolvimentu setór komunikasaun sosiál iha atividade instala rede televizaun dijitál terrestre.