Print this page

ONU Informa Ba Xanana: Ema Mate Tanba Covid-19 Bele Hakoi Iha Uma Featured

By Saturnina da Costa Abril 14, 2021 1567
Delegadu ONU-OMS iha Timor-Leste entrega karta ba Lider Karismatiku Kay Rala Xanana Gusmao, iha Sentru Izolamentu Vera Crus nia oin, kuarta (14/4). Delegadu ONU-OMS iha Timor-Leste entrega karta ba Lider Karismatiku Kay Rala Xanana Gusmao, iha Sentru Izolamentu Vera Crus nia oin, kuarta (14/4).

DILI:Organizasaun Nasoins Unidas hato'o karta ofisial ba lider Karismatiku Kay Rala Xanana Gusmão, katak ema mate tanba Covid-19 bele hakoi mate-isin iha uma tuir kultura, no relijaun iha ida-idak nia nasaun.

Karta ne’e dirije husi Nasoins Unidas Residente, Kordenadór iha Timor-Leste, Roy Trivedy ne’ebé lori husi delegadu ONU nian na’in rua entrega ba Xanana Gusmão, iha Sentru Izolamentu Vera Crus nia oin, kuarta (14/4), tuku 09:00 dader, hodi buka solusaun ba mate-isin Armindo Borges ne’ebé loron rua ona rai hela iha konzeladór Izolamentu Vera Crus Dili.

Hafoin simu karta ne’e, Xanana esplika konteúdu husi karta ONU nian, ko’alia kona-ba prevensun Covid-19 no ema mate ba Covid-19 bele hakoi tuir kultura no relijiaun nian, maibé tenki tuir nafatin protokolu Oorganizasaun Mundial Saude (OMS).

“Ohin Señór ida husi WHO nia mai entrega karta ida, buat hotu-hotu kona-ba Covid-19 nian,” hateten Lider Nasional ne’e ba jornalista iha Izolamentu Vera-Kruz, hafoin simu karta husi reprezentante ONU no Ministra Saúde, Odete Belo.

Tanba ne’e lider karistimatika husu nafatin atu povu Timor-Leste kontinua respeitu nafatin regras prevensaun Covid-19.

“Ne’e duni se mak mate ba Covid-19 bele halo tuir buat sira ne’e hotu. Maibé tuir regra hodi labele transmiti ba ema hotu-hotu,”Xanana husu hafoin lee karta OMS ne’e.

Xanana deklara, ba família no seguransa nomos ba vitimia sira tenki kumpri norma hotu-hotu, inklui dignidade ema ne’ebé mate ona.

Tuir observasaun Online Independente iha terrenu katak Ministra Saúde, Odete Belo ho reprezentante ONU husi OMS mak mai hasoru eis Prezidente Repúblika, Kay Rala Xanana Gusmão iha Sentru Izolamentu Vera Cruz nia oin, Kuarta, (14/4/2021), iha horas 8:00 dader.

Molok ne’e Xanana halo asaun protesta ba Governu hafoin hetan keixa husi familia Matebian Armindo Borges, tanba ekipa Sentru Integradu Jestaun Krize la entrega mate-isin ba hakoi iha uma tuir kultura timor nian.

Xanana ho familia matebian halo asaun hasoru Governu durante loron rua no kalan rua toba iha Sentru Izolamentu Vera Crus nia oin, hahú loron segunda 12 too 14 fulan-Abril.

Entretantu kontribuisaun husi eis Primeiru-Ministru ba prevensaun moras Covid-19 iha tinan kotuk (2020) ne’ebé orienta ekipa servisu hodi harí uma kuarentena ba ema ne’ebé iha sintomas hanesan Covid-19, iha Tasi-Tolu (atual fatin izolamentu).

Aliende ne’e, Xanana mós apela ba populasaun atu kuidadu ho moras Covid-19 ne’e hodi tuir regras protokolu Organizasaun Saúde Mundial (OMS) ba prevensaun.

Husu populasaun atu respeita regra, kumpri distansia sosial, fasé lima ho sabaun, inan-aman hanorin labarik sira atu labele kosé matan no inus ho liman bainhira seidauk fasé liman.

 

Jornalista: Saturnina da Costa

Editor: Jose Sarito Amaral

Rate this item
(1 Vote)
Last modified on Kuarta, 14 Abril 2021 17:12