Ministru Negósius Estranjeirus Japaun, Takeshi Iwaya, dehan nia "laran triste teb-tebes" ba saudozo Lú-Olo no fó apresiasaun ba kontribuisaun boot ne'ebé nia halo hodi hametin amizade entre Japaun no Timor-Leste.
Iha deklarasaun ida ne'ebé públika husi Ministériu Negósius Estranjeirus Japaun, Iwaya hateten katak eis-prezidente ne'e halo "kontribuisaun ne'ebé la bele sukat" ba relasaun entre nasaun rua ne'e.
Prezidente Portugal, António José Seguro, iha domingu lamenta Lú-Olo nia mate. Iha nia deklarasaun, nia destaka papel importante ne'ebé "la bele hakbesik", dahuluk iha luta ba independénsia, no tuir mai iha prosesu harii Estadu Timoroan.
Ajénsia notísia Lusa mos relata katak Primeiru-Ministru Portugal, Luís Montenegro, transmite kondolénsia ba povu Timor-Leste.
Governadora-Jerál Austrália, Sam Mostyn, dehan Lú-Olo dedika nia moris tomak servisu ba nia rain no fó kontribuisaun importante ba konstrusaun nasaun depois restaura independénsia.
Tuir deklarasaun husi Government House, nia mos rekuiñese papel Lú-Olo nian hodi hametin relasaun entre Timor-Leste no Austrália.
Embaixadór Angola iha Timor-Leste, José Andrade de Lemos, dehan katak legadu Lú-Olo sei nafatin sai hanesan prova ba "korajen, dedikasaun no kompromisu" ba liberdade no soberania Timor-Leste.
Prezidente Cabo Verde, José Maria Neves, deskreve Lú-Olo hanesan "figura ida ne'ebé la bele falta iha istória Timor-Leste" no hanesan ida husi sira ne'ebé harii Timor-Leste independente no demokrátiku.
Delegasaun Uniaun Europeia iha Timor-Leste dehan katak Lú-Olo sei nafatin lembra ba nia "kompromisu durante nia moris tomak ba independénsia, soberania no dezenvolvimentu demokrátiku" Timor-Leste, no ba nia kontribuisaun hodi hametin parseria internasionál.
Embaixada Nova Zelándia mos dehan katak moris Lú-Olo nian nakonu ho servisu no dedikasaun ba nia nasaun, enkuantu Kambodja hato'o nia "tristeza kle'an" no solidariedade ba povu Timor-Leste.
Primeiru-Ministru Malázia, Anwar Ibrahim, lembra Lú-Olo hanesan lider ida ne'ebé durante nia moris tomak kompromete ba "liberdade ba nia povu no harii nasaun demokrátika", tuir deklarasaun ne'ebé públika iha nia pajina ofisiál média sosiál.
Prezidente Repúblika Demokrátika Árabe Sahrawi, Brahim Ghali, deskreve Lú-Olo hanesan defensór firme ba direitu determinasaun-an, ne'ebé nia luta inspira povu barak liu husi fronteira Timor-Leste.
Misaun diplomátika sira ne'ebé iha Díli mos hamutuk hato'o kondolensia omenajen ba eis-prezidente.
Omenjaén sira ne'e kontinua mos iha tempu ne'ebé Timor-Leste hakotu despedida ikus ba nia eis-prezidente iha sexta-feira liuhusi serimónia funebre Estadu ne'ebé partisipa husi dignitáriu sira, diplomata no ema rihun ba rihun.
Omenjaén ne'ebé kontinua mai husi Ázia, Europa, Pasífiku no Áfrika hatudu katak Francisco Guterres "Lú-Olo" hetan respeitu boot la'ós deit iha Timor-Leste, maibé mos iha komunidade internasionál, hanesan eis-Xefe Estadu, lider rezisténsia no ida husi figura prinsipál sira iha dalan luta no konstrusaun nasaun Timor-Leste.