Print this page
Ro Succes tula hela sasan atu lori ba  vitima inundasaun iha RAEAO. Foto Camilio de Sousa/INDEPENDENTE Ro Succes tula hela sasan atu lori ba vitima inundasaun iha RAEAO. Foto Camilio de Sousa/INDEPENDENTE

Ohin, Ró Succes Tula Aihan Ba Vitima Inundasaun Iha RAEOA Featured

DILI:Inundasaun ne’ebé akontese iha loron 4 fulan-Abril, laos de’it akontese iha kapital Dili, maibé afeta mós ba Munisipio balun inkluindu Rejiaun Administrativa Espesial Oekusse-Ambeno (RAEOA).

Tanba ne’e, tersa ohin (13/4) Governu Timor-Leste liuhusi Sekretariu Estadu Protesaun Sivil (SEPS)-CLN servisu hamutuk ho kompañia Ró Succes hodi tula sasan aihan bazika no nesesidade seluk.

Diretór Nasional Diresaun Dezastre, Agustinho Gosme Belo hateten, aihan bazika ne’e tula ba RAEOA bazea ba pedidu husi Presidente ZEEMS-ZEEMS katak aihan iha armazen Oekuse komesa menus ona tanba ne’e SEPS atende lalais ba pedidu ida ne’e.

Aihan bazika ne’eb’e tula ona ba RAEOA mak hanesan, foos sakas 300, supermi kaixa 250, ikan kalen sardinas kaixa 125, mina litru 2,42, susu ben lata kaixa 21, biskuit kalen kaixa 42, biskuit masin kaixa 21 no sasan seluk hanesan, manta kaixa 10, pasta kitt kaixa 50 no family kitt packet hanesan ekipamentu dapur nian hamutuk kaixa 250,

"Apiou aihan bazika ba komunidade afetadu inundasaun iha Oekusse,  SEPS atende ho emerjensia tanba ne’e ohin Ró Succes tula ona,”dehan Agustino iha Portu Dili ba Jornalista Online Independente, iha tersa ne’e.

Nia informa, sasan hirak ne’e sei distribui ba kada uma ka’in ne’ebé vitima husi inundasaun hamutuk 250   iha RAEOA.

Enkuantu Agustinho afirma katak, apoiu  emerjensia aihan bazika no sasan sira seluk ba vitima inudasaun iha Munisipiu sira hanesan Vikeke, Aileu, Ermera, Manatuto no Likisa sei realiza iha semana ida ne’e.

Entertantu tuir dadus provizorio ba vitima sira ne’ebe afetadu husi inundasaun iha teritorio nasional   hamutuk ema na’in 46 mak mate, uma 10,000 resin mak stragus, uma mota lori no monu husi foho lolon hamutuk 100 no ema rihun 8 mak refujia ba sentru refujiadu hamutuk 18 iha Dili.

 

Jornalista: Camilio de Sousa

Editor: Jose Sarito Amaral

Read 1070 times Last modified on Tersa, 13 Abril 2021 16:08
Rate this item
(0 votes)