Iha 31 Outubru ne’e, Primeiru Ministru, Kay Rala Xanana Gusmão, hamutuk ho Ministru Obras Públika, Samuel Marcel no entidade sira hala’o lansamentu fatuk dahuluk ba konstrusaun estrada husi Lautem ba Kom no husi Lautem ba Lospalos.
PM Xanana hatete, projetu reabilitasaun estrada ne’e hola parte iha Planu Estratejiku Dezenvolvimentu Nasionál 2011-2030.
"PEDN ne’e define katak infraestruturas bazika mak sai hanesan baze ba dezenvolvimentu. Ida ne’e klasifika tiha ona ba estrada nasionais, estrada rejionais, estradas lokais no estrada rurais,” dehan Xefe Governu ne’e hafoin lansamentu.
PM Xanana dehan, nia prezensa iha ne’e atu hamutuk ho komunidade sira iha Lautem hodi asiste serimónia asinatura kontratu ho kompaña.
“Ita sai sasin atu nia bele halo ho di’ak no kualidade,” dehan Xanana.
PM husu ba komunidade atu koopera ho kompañia, no labele halo impedimentu, nune’e bele servisu ho lalais, ho kualidade, no finaliza tuir tempu ne’ebé determina ona.
“Ami mai hotu iha ne’e, ha’u kontente tebes tanba ama ferik sira ho katuas sira barak sei iha hela. Sira ne’e mak luta na’in liu husi terus oioin durante tinan 24 hodi ita hetan independénsia. Tanba ne’e, ita halo dezenvolvimentu ne’e atu ba sira. Kualkér see mak sai boot atu ukun iha obrrigasaun atu halo di’ak bá rai ne’e hodi selu sira-nia sakrifísiu,” katak PM Xanana
Iha fatin hanesan, Ministru Obras Publikas (MOP), Samuel Marçal agradese bá ekipa tomak husi MOP no parte relevante sira ne’ebé servisu hamutuk hodi bele realiza lansamentu ne’e.
Ministru husu atu entidade hotu-hotu kolabora nune’e kompañia bele finaliza projetu ne’e ho di’ak.
Kona-ba bainhira mak hahú implementa projetu ne’e, Ministru hatan katak, hafoin finadu kompaña sei hahú servisu.
"Finadu liu, dia 04 tenke hahú, tenke aselera servisu ne'e lalais tuir kontratu ne'ebé iha," dehan nia.
Iha sorin seluk, Prezidente Autoridade Munisípiu (PAM) Lautém, Mélio de Jesus agradese bá PM Xanana ne’ebé servisu maka’as hodi realiza duni serimónia hatuur fatuk dahuluk ba projetu refere.
Entretantu, Projetu rehabilitasaun estrada Lautém bá Kom ne’e ho nia sesaun STA 182+040-STA.201+800 (19.760 Km) ho montante orsamentu $11, 213, 813.30 ne’ebé superviziona MOP, no durasaun servisu durante loron 365, ne’ebé responsabiliza husi kompaña SHA SNXI Construction engineering Group Coorporation Limited.
Enkuantu, ba projetu estrada husi Lautem-Lospalos ho kilometru 27.980 implementa husi kompañia ChongQing, ho durasaun tinan ida ho balun, ho orsamentu $18,836,713.10.